Atyraý oblysynda jol apatynan 5 adam qaza tapty
ATYRAÝ. QazAqparat - Atyraý oblysynda kúrdeli jol apaty oryn alyp, bes adam oqıǵa ornynda kóz jumdy, dep habarlaıdy Polisia.kz.
Búgin tańerteń Qulsary-Teńiz tas jolynda Jylyoı aýdany Teńiz vahtalyq kentinen 25 shaqyrym qashyqtyqta eki avtokólik soqtyǵysty.
Reseıde esepte turǵan Chevrolet Aveo markaly kóliginde Qazaqstannyń 4 azamaty bolǵan. Olardyń barlyǵy apat ornynda qaza tapty. Qarama-qarsy baǵytta kele jatqan «Lada 2131» markaly ekinshi kólikte Batys Qazaqstan oblysynyń turǵyndary otyrǵan. Júrgizýshi alǵan jaraqattan oqıǵa ornynda qaza taýyp, jolaýshy aýrýhanaǵa jetkizildi.
QR Qylmystyq Kodeksiniń 345-baby 4-bóligi boıynsha sotqa deıingi tergeý bastaldy.
Oryn alǵan jaǵdaıdyń mán-jaıy men sebepteri saraptama júrgizilgennen keıin anyqtalady.
