Atyraý oblysynda jol apatynan 4 sheteldik mert boldy
Oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy búgin, 20 mamyrda bolǵan.
Jol apaty saǵat 02:20 shamasynda Atyraý oblysynyń aýmaǵynda Dossor-Qulsary-Beıneý tas jolynyń 133-shi shaqyrymynda Toyota Ipsum men KamAZ júk kóligi soqtyǵysqan. Jol apaty saldarynan Toyota Ipsum avtokóligi órtenip ketken. Onyń júrgizýshisi men 3 jolaýshysy mert boldy. Al, 2 jolaýshy túrli dene jaraqattarymen aýrýhanaǵa jetkizilgen.
«Jol qozǵalysynyń qaýipsizdigin saqtaý – adam ómirin saqtaý. Júrgizýshilerge óziniń jáne ózgeniń qaýipsizdigine nemquraıly qaramaýdy udaıy eskertip kelemiz. Búgin túnde tórt adamnyń ómirine qıylǵan jol apaty oryn boldy. Arasynda 4-5 jas shamasyndaǵy búldirshin bar. Qaza tapqandardyń jeke basyn anyqtaý jumystary júrgizilip jatyr. Kóz jumǵandar Ózbekstan Respýblıkasynyń azamattary ekeni anyqtaldy», -deıdi patrýldik polıtsııa rotasynyń komandıri polıtsııa kapıtany Ádilbek Shahmetov.
Onyń aıtýynsha, Toyota Ipsum kóliginiń júrgizýshisine jyl basynan beri 10 hattama toltyrylǵan. Jol qozǵalysy kezinde jyldamdyqty shamadan tys arttyrǵany úshin 8, qaýipsizdik beldigin taqpaǵany úshin toltyrylǵan 2 hattama bar.
«Mundaı quqyq buzýshylyqtar – jol qaýipsizdinine tikeleı áser etetin faktorlar. Barlyq júrgizýshige joldaǵy jaýapkershilikti esten shyǵarmaýyn eskertemin», - dep málim etti Ádilbek Shahmetov.
Eske sala ketelik, buǵan deıin Atyraý oblysynda bıylǵy úsh aıda jol-kólik oqıǵalary 15,2 paıyzǵa azaıǵanyn habarlaǵan bolatynbyz.