Atyraý oblysynda jol apatynan 4 adam mert bolyp, 3 jolaýshy aýrýhanaǵa jetkizildi
Atyraý oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy búgin, 28 aqpanda saǵat 07:55 shamasynda bolǵan.
«Aqtóbe-Atyraý-Reseı Federatsııasynyń shekarasy» (Astrahan) baǵytyndaǵy tasjoldyń 492-shaqyrymynda Toyota Ipsum avtokóliginiń júrgizýshisi kólik quralyn ıgere almaǵan. Sonyń saldarynan joldyń qarsy baǵytyna shyǵyp, aýyr júk kóligimen soqtyǵysady. Qyzylqoǵa aýdany baǵytynda júrip bara jatqan kóliktegi 4 adam qaza taýyp, 3 jolaýshy ártúrli dene jaraqattarymen Maqat aýdandyq aýrýhanasyna jetkizildi», - dep habarlady departamenttiń baspasóz qyzmeti.
Eske sala ketelik, buǵan deıin Atyraýda jol apatynan júrgizýshi oqıǵa ornynda, bir jolaýshy aýrýhanada kóz jumǵanyn jazǵan edik.
Sondaı-aq, KamAZ-ǵa soǵylǵan LADA júrgizýshisi men onyń úsh jolaýshysy aýrýhanaǵa túsken bolatyn. Jol-kólik oqıǵasy 18 aqpanda Mahambet aýdanynyń aýmaǵynda tirkelgen.
«Jergilikti ýaqytpen saǵat 16:10 shamasynda respýblıkalyq mańyzy bar «Atyraý-Oral» baǵytyndaǵy tasjoldyń 62-shaqyrymy tusynda eki kólik soqtyǵysty. Jol apatynyń saldarynan KamAZ-ǵa soǵylǵan LADA jeńil avtokóliginiń júrgizýshisi men 3 jolaýshysy túrli dene jaraqatyn aldy. Zardap shekken 4 adam Mahambet aýdandyq aýrýhanasyna jetkizildi», - dep málim etken edi departamenttiń baspasóz qyzmeti.
