Atyraý oblysynda joǵary oqý ornyna túsýshi talapkerlerge 230 grant bólindi

ATYRAÝ. QazAqparat - Atyraý oblysynda jergilikti bıýdjetten joǵary oqý ornyna túsýshi talapkerlerge 230 grant bólindi. Keshe Atyraý oblysynyń ákimi Nurlan Noǵaevtyń tóraǵalyǵymen bilim berý grantyn bólý jónindegi konkýrstyq komıssııanyń otyrysy ótti, dep xabarlaıdy QazAqparat tilshisi.       

Mamandardy daıyndaý maqsatynda granttar bilim berý, densaýlyq saqtaý, aýyl sharýashylyǵy jáne jeńil ónerkásip salalaryna bólindi.

Talapkerlerden barlyǵy 325 ótinish qabyldanyp, komıssııa otyrysynyń qorytyndysy boıynsha 230 úzdik talapkerdiń ótinishteri qanaǵattandyryldy. 

  Onyń 149-y pedagogıkalyq jəne 56-si medıtsınalyq, 9-y agrarlyq aýylsharýashylyq, 2-i jeńil ónerkásip buıymdarynyń tehnologııasy men dızaıny, sondaı-aq 14-i avtomattandyrý jáne basqarý mamandyqtary.

Budan bólek, 16 stýdent "Óńirlik ekonomıkalyq damý baǵdarlamasy" men "Jerdi paıdalaný basqarmasynyń" sheńberinde bilim granttaryna ıe boldy.

"Jergilikti bıýdjet esebinen oqý múmkindigine ıe bolǵan jastar úzdik bolýy tıis, óıtkeni olar keıin óńirimizde eńbek etetin bolady. Biz talapkerlerdi egjeı-tegjeıli iriktep alyp otyrmyz, árbir grantty memleket belgili bir maqsatpen bólip otyr. Joǵary oqý oryndaryn bitirgennen keıin túlekter mamandyǵy boıynsha jumysqa ornalasady. Osylaısha atalǵan saladaǵy maman tapshylyǵyn joıatyn bolamyz",- dep atap kórsetti Nurlan Noǵaev. 

Aıta keteıik, 2017 jyly Atyraý oblysynyń ákimdigi 222 bilim berý grantyn bóldi. Olardyń 178-i pedagogıkalyq, 35-i medıtsınalyq jáne 9-y veterınarlyq mamandyqtarǵa bólingen bolatyn.

Memleket esebinen oqyǵan stýdentter oqýyn bitirgennen keıin Atyraý oblysynyń aýmaǵynda mamandyǵy boıynsha jumys jasaıdy.