Atyraý oblysynda joǵalyp ketken úsh adam bir kúnnen keıin tabyldy
Oblystyq tótenshe jaǵdaılar departamentiniń qoǵammen baılanys tobynan málim etkendeı, úsh er adam 7 aqpanda saǵat 07:00 shamasynda jolǵa shyǵyp, habarsyz ketken.
«Úsh adam Maqat aýdanyndaǵy Dossor kentinen «KamAZ» kóligimen «Ótemis» ken ornyna qaraı jolǵa shyqqany anyqtaldy. Bul – Dossor kentinen 120 shaqyrym qashyqtaǵy ken orny. Alaıda, 31 jáne 53 jastaǵy úsh adam kún raıynyń qolaısyzdyǵynan keri orala almaǵan», -dep habarlady departamenttiń qoǵammen baılanys toby.
Tótenshe jaǵdaılar departamentiniń dıspetcherlik pýltine joǵalǵan adamdar týraly 8 aqpanda saǵat 05:50 shamasynda habar túsken.
«Osyǵan baılanysty 5 qyzmetker jol talǵamaıtyn «TREKOL» kóligimen jedel jolǵa shyǵyp, izdestirý-qutqarý jumysyna kiristi. Іzdestirý jumysy 8 saǵat boıy júrgizildi. Departamenttiń qyzmetkerleri joǵalǵan úsh adamdy «Ótemis» ken ornynan taýyp, Dossor eldi mekenine jetkizdi. Olardyń densaýlyǵyna zaqym kelmegen. Sol sebepten, medıtsınalyq kómekti qajet etpedi», -dep málim departamenttiń qoǵammen baılanys tobynan.
Oblystyq tótenshe jaǵdaılar departamenti aýa raıynyń qolaısyzdyǵyna baılanysty turǵyndarǵa daýyldy eskertýlerge nazar aýdaryp, alys jolǵa shyqpaýdy eskertip otyr.
Eske sala ketelik, buǵan deıin Atyraýdy qalyń qar basyp, kólik qozǵalysy qıyndaǵanyn jazǵan edik.
Sondaı-aq, qalyń qar jaýǵan Atyraýda 190 adam qulap, jaraqat alǵan.