Atyraý oblysynda joǵalyp ketken Ózbekstan azamaty tabyldy

ATYRAÝ. QazAqparat – Atyraý oblysynda iz-túzsiz joǵalyp ketken Ózbekstan azamaty 3,5 saǵattan keıin tabyldy, dep habarlaıdy QazAqparat.

Oblystyq polıtsııa departamenti baspasóz qyzmetiniń aqparatyna qaraǵanda, Ózbekstan Respýblıkasynyń azamaty Maqat aýdanynda joǵalyp ketken.

Ózbekstan Respýblıkasynyń 38 jastaǵy azamaty jerlesiniń kóligimen Reseı Federatsııasynan kele jatqany anyqtaldy.

Ol «Atyraý – Dossor» baǵytyndaǵy joldyń boıynda kólikten túsip, belgisiz baǵytqa ketip qalǵan.

«Maqat aýdandyq polıtsııa bólimine kórshi el azamatynyń joǵalǵany týraly habar keshe, 20 aqpanda túngi saǵat 22:30 shamasynda tústi. Osyǵan baılanysty polıtsııa qyzmetkerleri jedel izdestirý is-sharasyn júrgizdi. Dossor kentindegi polıtsııa bólimshesiniń qyzmetkerleri sheteldik azamatty búgin, 21 aqpanda jergilikti ýaqtypen saǵat 02:00 shamasynda tapty. Іz-túzsiz joǵalǵan Ózbekstan Respýblıkasynyń týmasynyń Maqat aýdanyndaǵy №469 temirjol beketiniń tusynda júrgeni anyqtaldy», -dep habarlady departamenttiń baspasóz qyzmeti.

Eske sala ketelik, budan buryn Atyraý oblysynda joǵalyp ketken malshy bir kúnnen keıin aman tabylǵan edi.

Inder aýdanynyń Órlik aýylynan 30 shaqyrym qashyqtyqtaǵy «Amanǵalı» qystaǵynan túıemen shyqqan malshy 16 aqpanda joǵalǵan. Qutqarýshylar ony bir kúnnen keıin qystaqtan 5 shaqyrym qashyqtyqtan tapty. Malshy zardap shekpegen, úsik shalmaǵan.

Keıin janarmaıy taýsylyp, dalada qalǵan kólikten 4 adam qutqaryldy.

Aqtóbe oblysynyń Baıǵanın aýdanyndaǵy Mııaly aýylynan 4 adam kólikpen jolǵa shyǵyp, Atyraý oblysyndaǵy Qulsary qalasyna barmaq bolǵan.

Alaıda, jolaýshylar kóliktiń janarmaıy taýsylyp, elsiz dalada qalyp qoıǵan.

Jolaýshylar Qulsary qalasynan 120 shaqyrym qashyqtyqtaǵy «Namaztaqyr» ýchaskesinen tabyldy.

Kólikte 1976, 1979 jylǵy eki er adam, 44 jastaǵy áıel men 2018 jyly týǵan qyz bolǵan.