Atyraý oblysynda joǵalyp ketken malshy bir kúnnen keıin aman tabyldy
Budan buryn Atyraý oblysynda bir kún buryn iz-túzsiz joǵalyp ketken malshy tabylmaı jatqanyn habarlaǵan bolatynbyz.
Oblystyq tótenshe jaǵdaılar departamentiniń qoǵammen baılanys tobynan málim etkendeı, keshe, 15 aqpanda 53 jastaǵy er adam óriske mal aıdap ketken.
Ol tańerteń saǵat 09:00 shamasynda Inder aýdanynyń Órlik aýylynan 30 shaqyrym qashyqtyqtaǵy «Amanǵalı» qystaǵynan túıemen shyqqan. Sodan keıin iz-túzsiz joǵalyp, odan esh habar bolmaǵan.
«Oblystyq tótenshe jaǵdaılar departamentiniń dıspetcherlik pýltine búgin, 16 aqpanda saǵat 09:00-de er adamnyń túıemen mal baǵýǵa shyǵyp, keri oralmaǵany týraly habar tústi. Іz-túzsiz joǵalǵan 53 jastaǵy malshyny izdeýge 4 qutqarýshy jol talǵamaıtyn 1 tehnıkamen jedel attandy. Іzdestirý jumysyna Inder aýdandyq polıtsııa bóliminiń qyzmetkerleri, joǵalǵan adamnyń týystary men aýyl turǵyndary da shyqty», -dep habarlady departamenttiń qoǵammen baılanys toby.
Departament qutqarýshylary búgin jergilikti ýaqytpen saǵat 14:30 shamasynda joǵalǵan malshyny Amanǵalı qystaǵynan 5 shaqyrym qashyqtyqtan aman-esen tapty.
Malshy zardap shekpegen, úsik shalmaǵan. Densaýlyǵynda kinárat bolmaǵandyqtan medıtsına qyzmetkerleriniń kómegine júginbegen.
«Atyraý oblysynda aqpan aıynyń basynan beri qolaısyz aýa raıy saqtalyp otyr. Sol sebepten, turǵyndarǵa alys jolǵa shyqpaýdy eskertemiz. Aldaǵy aýa raıynyń boljamy týraly 112 qyzmetiniń sms habaryna nazar aýdarýdy suraımyz», -dep málim etti departamenttiń qoǵammen baılanys tobynan.
Eske sala ketelik, buǵan deıin Atyraý oblysynda 1 qańtarda joǵalǵan er adam kórshi aýyldan, taǵy úsh adam bir kúnnen keıin tabylǵan edi.
Foto: Atyraý oblystyq TJD baspasóz qyzmeti
