Atyraý oblysynda joǵalyp ketken qyz Qyzylordadan tabyldy
ATYRAÝ. QazAqparat - Atyraý oblysynda 5 mamyrda joǵalyp ketken qyz Qyzylorda qalasynan tabyldy, dep habarlaıdy QazAqparat tilshisi.
Eske salaıyq, qyz bala 2018 jyldyń 5 mamyrynda úıinen shyǵyp ketken. Osydan keıin iz-túzsiz joǵalǵan qyzdyń ata-anasy Qurmanǵazy aýdanynyń ІІB-ne aryz jazyp, áleýmettik jelilerde sýretterin taratqan.
«Sińilim Alına joǵalǵan kezde bizben birge alańdaýshylyq bildirgenderdiń barlyǵyna úlken alǵysymyzdy bildiremiz. Jaqsy jańalyǵym bar - sińilimdi Qurmanǵazy aýdanynyń polıtseıleri aman-esen tapty. Osyndaı jaqsy jańalyq, qoldaý bildirgender men jyly sóz aıtqandardyń barlyǵyna rahmet», - dep jazdy áleýmettik jelide Alınanyń ápkesi Mıra Qurmanalıeva.
Anyqtalǵandaı, ol jigitimen Qyzylorda qalasyna ketip qalǵan, al ata-anasy izdeý salǵannan keıin olarǵa habarlasyp, amandyǵyn aıtqan.
