Atyraý oblysynda joǵalyp ketken 3 adam tabyldy

Oblystyq Tótenshe jaǵdaılar departamenti baspasóz qyzmetiniń aqparatyna qaraǵanda, keshe, 14 qańtarda Atyraý oblysynda Qyzylqoǵa men Jylyoı aýdanynda turǵyndardyń joǵalý deregi tirkelgen. Sondaı derektiń biri 14 qańtarda saǵat 18:54-te Jylyoı aýdanynan túsken.

«Esen-Aman» sharýa qojalyǵynyń 2 qoıshysy saǵat 15:30 mınýt shamasynan beri habarsyz ketkeni habarlandy. Soǵan baılanysty departamenttiń aýdandyq bóliminen 4 qyzmetker men «Esen-Aman» sharýa qojalyǵynan 1 adam «TREKOL» avtokóligimen izdeýge shyqty. Olar aýdan ortalyǵy – Qulsary qalasynan 70 shaqyrym qashyqtaǵy «Sholtaqaı» ýchaskesindegi mal qystaǵynan radıýsy 30 shaqyrymdyq aýmaqta izdestirý jumysyn júrgizdi. Sonyń nátıjesinde búgin, 15 qańtarda saǵat 2:50-de «Kaztransoıl» AQ-na qarasty №3 munaı aıdaý stantsııasyna tartylǵan elektr jelisiniń 306-baǵanasynyń tusynan joǵalǵan 2 azamat tabyldy. Onyń biri – Aqtóbe oblysynyń turǵyny, ekinshisi – Ózbekstan Respýblıkasynyń azamaty. Olar shańdy daýylda baǵyp júrgen 950 bas qoı men 1 bas jylqydan aıyrylyp qalǵan. Al ózderi adasyp ketken», -dep habarlady departamenttiń baspasóz qyzmetinen.

Sondaı-aq, 14 qańtarda Qyzylqoǵa aýdanyda «Daýlet» sharýa qojalyǵynan «ÝAZ» avtokóligimen Jangeldın aýylyna shyǵyp ketken bir azamat joǵalǵan. Ony izdestirýge tótenshelikter men polıtsııa bóliminen 6 qyzmetker jumyldyrylǵan. Joǵalǵan azamat «Jamansaı» ýchaskesiniń mańynan tabylǵan. Ol kóliginiń janarmaıy taýsylyp, dalada turyp qalǵan.

Eske sala ketelik, budan buryn Atyraý oblysynda 60 jastaǵy er adam joǵalyp ketken edi.