Atyraý oblysynda joǵalyp ketken 11 adam izdestirilip jatyr
ATYRAÝ. QazAqparat – Atyraý oblysynda joǵalyp ketken 11 adam izdestirilip jatyr, dep habarlaıdy QazAqparat.
Oblystyq tótenshe jaǵdaılar departamentiniń qoǵammen baılanys tobynan málim etkendeı, Isataı aýdanynda 11 adam joǵalyp ketken.
«Búgin, 9 mamyrda saǵat 10:50-de Isataı aýdanynda bir kún buryn habar-osharsyz ketken 11 adamdy izdestirý qaıta jalǵasty. «ÝAZ» markaly avtokóliginiń júrgizýshisi men 10 jolaýshy 8 mamyr kúni saǵat 14:00-de «Aqmandaı» ýchaskesine barý úshin jolǵa shyqqan. Bul ýchaske aýdan ortalyǵy – Aqqystaý aýylynan 160 shaqyrym qashyqta ornalasqan. Alaıda, jolǵa shyqqan adamdar osy ýaqytqa deıin Aqqystaý aýylyna oralmaǵany anyqtaldy», -dep habarlady departamenttiń qoǵammen baılanys toby.
Joǵalǵan adamdardy izdestirý jumystaryna Atyraý oblystyq tótenshe jaǵdaılar departamentiniń 4 qyzmetkeri men jol talǵamaıtyn «TREKOL» tehnıkasy tartyldy. Іzdestirý is-sharasyna Isataı aýdandyq polıtsııa bóliminiń 1 qyzmetkeri shyqty.
Sondaı-aq, 8 mamyrda saǵat 21:00-de Kaspıı teńizine taıaý jerdegi batpaqqa batyp qalǵan kólikten 2 adam qutqarylǵan.
«Atyraý qalasyna taıaý ornalasqan Erkinqala aýyldyq okrýginen 15 shaqyrymdaı qashyqtyqta «Land Cruizer» markaly avtokóliginiń batpaqqa batyp qalǵany týraly habar tústi. Kólikte 2 adam bolǵan. Batpaqqa batqan kólikke jedel-qutqarý jasaǵynyń 2 qyzmetkeri arnaıy tehnıkamen jedel jetti. Qutqarylǵan eki adam Erkinqala aýyldyq okrýgine deıin jetkizildi. Olar jedel medıtsınalyq kómekke júgingen joq», -dep málim etti qoǵammen baılanys tobynan.
Eske sala ketelik, budan buryn Atyraý oblysynda jolaýshylar avtobýsy sýǵa túsip ketkenin jazǵan bolatynbyz.
