Atyraý oblysynda joǵalǵan jigittiń denesi Oıyl ózeninen tabyldy
ATYRAÝ. QazAqparat – Qyzylqoǵa aýdanynyń Tasshaǵyl aýylynan mal izdeýge shyǵyp, iz-túzsiz joǵalǵan jigittiń múrdesi búgin, 25 sáýirde Oıyl ózeninen tabyldy, dep habarlaıdy QazAqparat.
Joǵalǵan jigittiń jasy – 21-de. Ol 21 sáýirde saǵat 09:00-de Tasshaǵyl aýylynan belgisiz baǵytqa mal izdeýge shyǵyp ketken. Sodan beri odan esh derek bolmady.
Dalalyq jazyqtan tabylmaǵan soń ony Oıyl ózeninen izdeýge sheshim qabyldandy.
«Burnaǵy kúni, 23 sáýirde saǵat 19:00 shamasynda ózennen joǵalǵan jigit minip ketken attyń óleksesi tabyldy. Al, búgin, 25 sáýirde saǵat 09:45-te iz-túzsiz ketken jigittiń múrdesi ózenniń jaǵaǵa jaqyn tusynan tabylyp, sýdan shyǵaryldy», -dep habarlady departamenttiń baspasóz qyzmeti.
Joǵalǵan jigitti izdeýge departamenttiń 6 qyzmetkeri men 2 tehnıkasy, onyń ishinde 1 júzý quraly tartyldy.
Buǵan deıin Atyraý oblysynda 21 jastaǵy jigit iz-túzsiz joǵalyp ketken edi.
Keıin onyń aty ózennen óli tabylǵan bolatyn.
