Atyraý oblysynda joǵalǵan jigitti izdeýge tikushaq tartyldy

ATYRAÝ. QazAqparat – Atyraý oblysynda 10 kún buryn iz-túzsiz joǵalǵan 24 jastaǵy jigit áli tabylǵan joq. Búgin ony izdeýge tikushaq tartyldy, dep habarlaıdy QazAqparat tilshisi.

Oblystyq tótenshe jaǵdaılar departamenti qoǵammen baılanys tobynyń málimetinshe, 24 jastaǵy jigit 20 qarashada tańǵy saǵat 05:00-de úıine shyǵyp ketken. Sodan beri odan esh habar bolmaǵan.

Іz-túzsiz joǵalǵan jigit – Qyzylqoǵa aýdanyndaǵy Jambyl aýyldyq okrýgine qaraıtyn Qarakól aýylynyń turǵyny. 1998 jyly týǵan jigitti izdeýge alǵashqy kúni Tótenshe jaǵdaılar departamenti men Qyzylqoǵa aýdandyq polıtsııa bóliminen, jergilikti atqarýshy organ men týystarynan 37 adam qatysty. Tańda úıinen shyǵyp, keri oralmaǵan 24 jastaǵy jigitti izdeý tórt kún qatarynan júrgizilip, keıin toqtatylǵan.

«Joǵalǵan jigitti izdeý jumystary tótenshe jaǵdaılar departamentiniń jáne týystarynyń qatysýymen qaıta jalǵasyp jatyr. Búgin, 30 qarashada jergilikti ýaqytpen saǵat 09:52-de habar-osharsyz ketken jigitti izdeýge «QazAvıaQutqarý» AQ-nyń «Evrokopter» tikushaǵy tartyldy. Tikushaq bortynda 7 adam bar», -dep habarlady departamenttiń qoǵammen baılanys tobynan.

Eske sala ketelik, budan buryn Atyraý oblysynda 24 jastaǵy jigitti úsh kúnnen beri izdep jatqanyn jazǵan bolatynbyz.

Sondaı-aq, Atyraý oblysynda joǵalǵan úsh adam bir kúnnen soń tabylǵan edi.

Onyń ekeýi 20 qarashada Atyraý qalasyna irgeles ornalasqan Qursaı aýylynan motorly qaıyqpen balyq aýlaý úshin Kaspıı teńizine shyqqan. Al, 40 jastaǵy áıeldiń Qurmanǵazy aýdanyndaǵy Sasyqtaý ýchaskesinen mal izdeýge shyqqany anyqtalǵan.

Vıdeodan alynǵan kadr