Atyraý oblysynda joǵalǵan eki bala beıtanys áıeldiń qasynan tabyldy
ATYRAÝ. QazAqparat - Atyraý oblysy Maqat kentinde keshke qaraı ondaǵan adam túni boıy joǵalǵan balalardy izdegen, dep habarlaıdy «QazAqparat» HAA tilshisi.
«Maqat aýdandyq ІІB-ge 20.30-da Maqat aýylynda bes jasar ul men tórt jasar qyzdyń joǵalǵany týraly habarlama túsken. Aýdandyq polıtsııanyń jeke quramy, osy aýdanǵa jaqyn aýdandardyń polıtseıleri, prokýratýra organdarymen qatar, eriktiler de izdeý jumystaryna atsalysqan. Saǵat 22.20-da balalardyń belgisiz áıelmen taksıge otyryp jatqanyn kórgeni týraly habarlama túsken. Sonymen qatar, izdeý barysynda osy aýdanda beısaýat áıeldiń júrgeni anyqtaldy», - dedi oblys prokýrory Ernat Sabynqulov.
Bul aqparat, árıne, odan ári úreı týdyrǵan. Kórshi kentter men aýdan ortalyqtarynyń quqyq qorǵaý organdary qyzmetkerleri de izdeý jumystaryna jumyldyryldy. Bul - óz jemisin berdi.
«Tańǵy saǵat 4-te Jylyoı aýdany Qulsary qalasyndaǵy úıden 150 shaqyrym qashyqtyqtan balalardyń tabylǵany týraly habarlama tústi. Eń bastysy, balalardyń densaýlyǵyna eshqandaı zııan keltirilmegen, tek olar qatty tońyp qalǵan jáne ashyqqan. Olarǵa birden ata-analary bardy. Aldyn ala málimet boıynsha, olardy ol jerge belgisiz áıel alyp barǵan», - dedi oblys prokýrory.
Prokýratýranyń aqparaty boıynsha, qazirgi tańda oqıǵanyń mán-jaıy anyqtalyp jatyr. QR Qylmystyq kodeksiniń 125-baby «adam urlaý» boıynsha sotqa deıingi tergeý jumystary bastaldy.
