Atyraý oblysynda jeńil kólik Jaıyqqa batyp ketti
ATYRAÝ. QazAqparat – Atyraý oblysynda jeńil kólik Jaıyqqa túsip ketti, dep habarlaıdy QazAqparat.
Mahambet aýdandyq ákimdigi uıymdastyrý, jumyldyrý daıyndyǵy jáne memlekettik qyzmet sapasyn baqylaý bóliminiń bas mamany N.Berdiǵalıevtyń málimetinshe, oqys oqıǵa keshe, 15 naýryzda bolǵan.
«Keshki saǵat 19:05 shamasynda Mahambet aýylynyń turǵyny menshigindegi «Nıva Shevrole» avtokóligimen Jaıyq ózeniniń ústimen ótpek bolǵan. Alaıda, «Ótkel» eldi mekeni tusynda juqa muz jarylyp, avtokólik sýǵa bata bastaǵan. Júrgizýshi kólikten shyǵyp, jaǵalaýǵa jetken. Sodan soń aýdandyq tótenshe jaǵdaılar bólimine habarlaǵan», - dep málim etti N.Berdiǵalıev.
Onyń aıtýynsha, oblystyq Tótenshe jaǵdaılar departamentiniń 3 súńgýir-qutqarýshysy kelip, sý astyndaǵy kólikti súırep shyǵarý ishin tross baılaǵan. Sýǵa batqan kólik búgin, 16 naýryzda saǵat 13:40-ta jaǵalaýǵa shyǵarylǵan. Oǵan aýdandyq Tótenshe jaǵdaılar bóliminiń 6 qyzmetkeri, 2 traktor, polıtsııa qyzmetkerleri jumyldyryldy.
«Jaıyq ózeninde qatqan muz ústimen avtokólikpen ótýge tyıym salynǵan. Soǵan qaramastan, bul – aýdanda tirkelgen ekinshi derek. Budan buryn, 7 naýryzda Jalǵansaı aýyly turǵynynyń basqarýyndaǵy «Lada Granta» avtokóligi Jaıyq ózenine túsip ketken edi. Mundaı oqys oqıǵanyń oryn alýyna kólik júrgizýshileriniń qaýipsizdikti saqtamaı, belgilenbegen jerlerden ótýge umtylýy sebep bolyp otyr» - deıdi N.Berdiǵalıev.
Eske sala ketelik, budan buryn Atyraýda júk tıegish kóliktiń kanalǵa túsip ketkenin jazǵan bolatynbyz.
