Atyraý oblysynda jeńil kólik erigen qar sýyna batyp ketti
Búgin WhatsApp messendjeri men áleýmettik jelide «Mııaly-Saǵyz» aralyǵyndaǵy joldy sý basqany týraly vıdeo tarady.
Vıdeo avtorynyń aıtýynsha, jeńil kólik joldan túsip ketken.
Oqıǵa «Mııaly-Saǵyz» baǵytyndaǵy joldyń 35-shaqyrymyndaǵy Sorkól aýylynyń mańynda bolǵan.
Atyraý oblysy ákimi men oblystyq polıtsııa departamentiniń baspasóz qyzmetteri bul derekti rastady.
«Búgin, 7 naýryz kúni jergilikti ýaqytpen saǵat 06:30 shamasynda Qyzylqoǵa aýdanyndaǵy Jangeldın aýylynan shyqqan taksı júrgizýshisi kóligimen Sorkól aýylynyń tusynda joldan shyǵyp, jıektegi sýǵa túsip ketken. Oǵan kólikti qatty jyldamdyqpen júrgizip, basqarý júıesin ıgere almaǵany sebep bolǵan. Kóliktegi jolaýshylar zardap shekpegen. Jolaýshylar Sorkól, Saǵyz aýyldaryna jetkizildi», -dep málim etti oblys ákiminiń baspasóz qyzmetinen.
Qazir atalǵan jolda kólik qozǵalysy shektelmegen. Erigen qardyń sýynan jolǵa tónip turǵan qaýip joq.
«Qyzylqoǵa aýdanyndaǵy «Mııaly-Saǵyzy» tas jolynyń 35-shaqyrymynda qardyń erýinen aǵyn sý paıda bolyp, tas joldy basqan. Osyǵan baılanysty atalǵan jolmen júretin kólik júrgizýshilerinen saqtyq sharalaryna asa muqııat bolýdy eskertemiz», -dep habarlady polıtsııa departamentiniń baspasóz qyzmeti.
Eske sala ketelik, budan buryn Atyraý oblysyndaǵy 36 eldi mekendi sý basýy múmkin ekenin habarlaǵan bolatynbyz.
