Atyraý oblysynda jemqorlyq týraly habarlaǵandarǵa 2,6 mln teńge berildi
Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń birinshi orynbasary Aıdos Mamyttyń deregine súıensek, byltyr jáne bıylǵy birinshi toqsanda dáleldengen sybaılas demqorlyq deregi úshin 15 adamǵa 2 mln 600 myń teńge kóleminde yntalandyrý qarjysy berilgen.
«Máselen, bıylǵy 22 naýryzda saǵat 16:45-te senim telefony arqyly Atyraý temirjol stansasynda jelilik polıtsııa bólimi qyzmetkerleriniń bekire tuqymdas balyqtardy áketý deregimen qylmystyq jaýapkershilikke tartpaı úshin 50 myń teńge kóleminde para talap etkeni týraly habar tústi. Sol kúni osy derekke baılanysty eki polıtsııa qyzmetkeri ustaldy. Keıin polıtsııa qyzmetkerleri sottaldy. Al, habar bergen adamǵa 70 AEK nemese 204 myń 190 teńge mólsherinde aqshalaı syıaqy berildi», - dedi Aıdos Mamyt.
Onyń aıtýynsha, byltyr sybaılas jemqorlyq deregi týraly habarlaǵany úshin 11 adam 1,8 mln teńgeden astam qarjylaı syıaqy alǵan. Osy jyldyń úsh aıynda óńirdegi osyndaı habarlamalar úshin 4 adam jalpy somasy 700 myń teńgeden astam syıaqyǵa ıe bolǵan.
«Ótken jyldyń qorytyndysymen Atyraý oblysyndaǵy sybaılas jemqorlyq deregi polıtsııa, densaýlyq saqtaý, bilim berý jáne qurylys organdarynda anyqtaldy», - dedi ol.