Atyraý oblysynda Jem ózeni kóterilip, birneshe aýlany sý basty
Jem ózeni Jylyoı aýdanynyń ortalyǵy – Qulsary qalasyna taıaý mańnan aǵyp ótedi. Búgin atalǵan ózen sýy kóterilip, tańǵy saǵat 5:57-de Qulsary qalasyndaǵy 7-aýyldaǵy 3 aýlany sý basqan.
«Osyǵan baılanysty jeke ıeliktegi 3 turǵyn úıden 10 adam (onyń ishinde 4 bala) evakýatsııalanyp, týystarynyń baspanasyna ornalastyryldy. Eń qaýipti ýchaskedegi 7-aýyldyń turǵyn úılerin qorǵaý úshin topyraq úıindisi salynyp, qum toltyrylǵan qaptardy tóseý jumystary júrgizilip jatyr», - dep málim etti tótenshe jaǵdaılar departamentiniń baspasóz qyzmetinen.
Turǵyn úılerdi sý basýdan qorǵaý jumysyna departamenttiń 25 qyzmetkeri men 3 tehnıka, jergilikti atqarýshy organnan 30 qyzmetker men 1 tehnıka tartylǵan. Olarǵa kómekke aýdandyq polıtsııa bóliminiń 20 qyzmetker men 6 tehnıka kelgen.
Sondaı-aq, «Kazkomservıs» JShS-nan 9 qyzmetker, 9 tehnıka, «Jylyoı-Sý», «Jylyoı-Gaz» JShS-nan 6 qyzmetker, 6 tehnıka bólingen. Al, «Jylyoı-Munaı-Gaz» JShS 2 qyzmetkeri men 2 tehnıka jibergen.
Eske sala keteıik, buǵan deıin Atyraý oblysynyń Qyzylqoǵa aýdanynda tótenshe jaǵdaı jarııalanǵanyn habarlaǵan bolatynbyz.