Atyraý oblysynda jaz mezgilinde sýǵa shomylatyn 46 jaǵajaı belgilendi
Atyraý oblysynyń ákimi Serik Shápkenovtiń málimetinshe, byltyr 7 bala sýǵa ketken. Al, bıyl bul kórsetkish eki ese ósken.
«Atyraý qalasynda 3, Inder aýdanynda 1 jaǵajaı ǵana bar. Ózge aýdandarda birde bir jaǵajaı joq. Bul másele úsh jaqty komıssııa otyrysynda qaraldy. Nátıjesinde Atyraý oblysynda 46 jaǵajaı belgilendi. Máseleni oń sheshýdiń jalǵyz joly – jaǵajaılardy jeke kásipkerlerge jalǵa berý. Bizge kommýnaldyq jaǵajaılar ashý qajet. Jaǵajaılarda qutqarý beketi men qoǵamdyq qutqarýshylar bolýǵa tıis. Qoǵamdyq qutqarýshylardy jedel shtab jasaǵy tegin oqytyp, sertıfıkat berýge daıyn», - dep habarlady oblystyq tótenshe jaǵdaılar departamenti bastyǵynyń mindetin atqarýshy Ashat Erjanov.
Ákimniń pikirinshe, balalar qaýipsizdigi – óte mańyzdy máselen. Bul máseleni oń sheshý úshin naqty usynystar jasaý qajet.
Eske sala ketelik, budan buryn Atyraý oblysynda sý aıdyndaryna shomylý merzimi 15 maýsymǵa shegerilgenin jazǵan edik.
Atyraý oblystyq tótenshe jaǵdaılar departamenti azamattyq qorǵaý basqarmasynyń bastyǵy Baqyt Ablanovtyń aıtýynsha, shomylýǵa tyıym salynǵan 70 qaýipti ýchaske anyqtalǵan. Bul ýchaskelerde 238 tyıym salý belgisi men 9 aqparattyq stend ornatylǵan. Sý aıdyndarynda qaıǵyly oqıǵanyń aldyn alý maqsatynda kúndelikti úgit-profılaktıkalyq jumysqa 273 adam, 44 avtokólik pen júzý quraly jumyldyrylǵan.
