Atyraý oblysynda Jaıyqqa batqan aýdan ákiminiń máıiti tabyldy
Óńirlik kommýnıkatsııalar qyzmetiniń aqparatyna qaraǵanda, Mahambet aýdanynyń ákimi Rınat Janqylyshtyń denesi búgin, 1 tamyzda keshke jaqyn Jaıyq ózeninen tabylǵan.
«Qazir quzyrly organdar osy derek boıynsha tekserý júrgizip jatyr. Rınat Janqylysh 2021 jyldyń aqpan aıynan beri Mahambet aýdanynyń ákimi laýazymyn atqardy. Ol óz isiniń kásibı mamany retinde áriptesteriniń esinde qalady. Atyraý oblysynyń ákimi, barsha áriptesteri Rınat Baýyrjanulynyń mezgilsiz dúnıeden ótýine oraı marqumnyń otbasy men jaqyndaryna qaıǵyryp kóńil aıtady», -delingen óńirlik kommýnıkatsııalar qyzmeti taratqan aqparatta.
Budan buryn Atyraý oblysynda Jaıyqqa batqan aýdan ákimi áli tabylmaǵanyn jazǵan edik.
Oblystyq tótenshe jaǵdaılar departamenti qoǵammen baılanys tobynyń málimetinshe, Mahambet aýdanynyń ákimi 31 shildede saǵat 20:30 shamasynda Jaıyq ózenine sýǵa túsken. Alaıda, ózennen qaıta shyqpaı qalǵan.
Búgin, 1 tamyzda jergilikti ýaqytpen saǵat 6:10 shamasynda izdestirý jumystary bastaldy. Іzdestirý jumystaryna tótenshe jaǵdaılar departamentinen 9 qyzmetker men 2 júzý quraly tartyldy. Aýdandyq polıtsııa bóliminen 10 qyzmetker, týystarynan 15 adam kómekke kelgen.
Rınat Janqylysh Mahambet aýdanynyń ákimi laýazymyna 2021 jylǵy aqpan aıynda taǵaıyndalǵan.
Ol 1982 jyly 2 jeltoqsanda Atyraý qalasynda dúnıege kelgen. Bilimi joǵary, 2003 jyly Qazaq memlekettik zań ýnıversıtetinde, 2011 jyly Jambyl gýmanıtarlyq-tehnıkalyq ýnıversıtetinde, al 2017 jyly Atyraý munaı-gaz ýnıversıtetinde zańger, ekonomıst jáne munaı-gaz isi mamandyǵy boıynsha bilim alǵan. Eńbek jolyn 2005 jyly Almaty qalalyq ekonomıkalyq jáne sybaılas jemqorlyqqa qarsy kúres departamentinde tergeýshi bolyp bastaǵan. 2006-2018 jyldary birneshe jeke kásiporynda basshylyq etken. Al, 2018-2019 jyldary Atyraý qalasy máslıhatynyń hatshysy, 2019-2020 jyldary Atyraý qalasy ákiminiń orynbasary laýazymyn atqarǵan.