Atyraý oblysynda Jaıyqqa batqan aýdan ákimi áli tabylǵan joq
Oblystyq tótenshe jaǵdaılar departamentiniń qoǵammen baılanys tobynan málim etkendeı, Mahambet aýdanynyń ákimi 31 shildede saǵat 20:30 shamasynda Jaıyq ózenine sýǵa túsken. Alaıda, ózennen qaıta shyqpaı qalǵan.
Aýdan ákimi Rınat Janǵylyshtyń Mahambet aýdanyndaǵy Ortaqshyl aýyly mańynda Jaıyq ózeniniń jabdyqtalmaǵan tusynda sýǵa túskeni belgili bolyp otyr.
Búgin, 1 tamyzda jergilikti ýaqytpen saǵat 6:10 shamasynda izdestirý jumystary bastaldy. Іzdestirý jumystaryna tótenshe jaǵdaılar departamentinen 9 qyzmetker men 2 júzý quraly tartyldy. Aýdandyq polıtsııa bóliminen 10 qyzmetker, týystarynan 10 adam kómekke kelgen.
«Jergilikti ýaqytpen saǵat 13:00-ge deıin aýdan ákiminiń denesi tabylǵan joq. Súńgýirler sý astynan izdeýdi jalǵastyryp jatyr», - dep málim etti departamenttiń qoǵammen baılanys tobynan.
Rınat Janqylysh Mahambet aýdanynyń ákimi laýazymyna 2021 jylǵy aqpan aıynda taǵaıyndalǵan.
Ol 1982 jyly 2 jeltoqsanda Atyraý qalasynda dúnıege kelgen. Bilimi joǵary, 2003 jyly Qazaq memlekettik zań ýnıversıtetinde, 2011 jyly Jambyl gýmanıtarlyq-tehnıkalyq ýnıversıtetinde, al 2017 jyly Atyraý munaı-gaz ýnıversıtetinde zańger, ekonomıst jáne munaı-gaz isi mamandyǵy boıynsha bilim alǵan. Eńbek jolyn 2005 jyly Almaty qalalyq ekonomıkalyq jáne sybaılas jemqorlyqqa qarsy kúres departamentinde tergeýshi bolyp bastaǵan. 2006-2018 jyldary birneshe jeke kásiporynda basshylyq etken. Al, 2018-2019 jyldary Atyraý qalasy máslıhatynyń hatshysy, 2019-2020 jyldary Atyraý qalasy ákiminiń orynbasary laýazymyn atqarǵan.
Eske sala ketelik, budan buryn Atyraý oblysynda aýdan ákimi Jaıyqqa batyp ketkenin habarlaǵan bolatynbyz.
