Atyraý oblysynda Jaıyq ózeniniń jaǵalaýyn bekitýge 12 mlrd teńge bólingen

ATYRAÝ. QazAqparat – Atyraý oblysynda Mahambet aýylynyń tusynda Jaıyq ózeni jaǵalaýyn bekitý jobasy iske asyrylyp jatyr. Jaǵalaýdyń 4,5 shaqyrymyn bekitýge 12 mlrd 136 myń teńge bólingen, dep habarlaıdy QazAqparat.

Oblystyq energetıka basqarmasy basshysynyń orynbasary Asan Nurǵalıevtyń málimetinshe, jaǵalaýdy bekitý jobasynyń qurylysyn «PavlodarÓzenPorty» AQ byltyrǵy qyrkúıekte bastaǵan.

«Jaıyq ózeniniń jaǵalaýyn bekitý jobasy jaǵany qazý, topyraqty kúreý jumystarynan bastaldy. Jaǵalaýǵa 1 337 qada men 500-ge jýyq tyǵyn qaǵyldy. Oǵan 30 tehnıka men 30 jergilikti jumysshy jumyldyryldy. Qajetti qurylys materıaldary jetkilikti. Bıyl Jaıyq ózenine sý mol kelip, tez qaıtpaýyna baılanysty sáýir aıynan shildege deıin jumys toqtap qaldy. Ór sýy keri qaıtyp, jaǵalaý kepken soń jumys qaıta qolǵa alyndy», -dep habarlady Asan Nurǵalıev.

Onyń deregine qaraǵanda, jaǵalaýdy bekitý jumystaryn 2023 jyldyń qyrkúıek aıynda aıaqtaý josparlanyp otyr.

Sodan soń uzyndyǵy 4 shaqyrym, eni 3 metr jerge órnek tas tóseledi. Oryndyqtar men jaryq shamdary ornatylyp, balalarǵa oıyn alańy salynady.

Mahambet aýylynyń turǵyndary úshin jaǵalaýda serýendeýge arnalǵan alań ashylady.

«Buǵan qosa Alǵa aýylynyń tusynan jalpy quny 5 mlrd 521 myń teńgeni quraıtyn, 3,2 shaqyrym jaǵalaýdy bekitý jumystary iske asyrylady. Qazir bul jobaǵa túzetýler engizilip jatyr», -dep málim etti Asan Nurǵalıev.

Eske sala ketelik, budan buryn Atyraýda 11,3 mlrd teńgege sport-ınternat kesheni salynatynyn jazǵan bolatynbyz.