Atyraý oblysynda Jaıyq ózeni arqyly aınalma joldyń qurylysy bastaldy
«Jol aktıvteriniń ulttyq sapa ortalyǵy» RMK Atyraý oblystyq fılıalynyń bólim basshysy Nurlan Jantýrınniń aıtýynsha, aınalma jol Jaıyq ózeni arqyly salynady.
«Atyraý oblysynda halyqaralyq avtojol dálizinde ornalasqan aınalma jol bolǵan joq. Sol sebepten, Reseı arqyly keletin aýyr júk kólikteri ózge óńirlerge qatynaý úshin Atyraý qalasy arqyly ótetin jolmen júrýge májbúr. Aýyr júk kólikteri qalaishilik joldardyń sapasyn buzady. Tar kóshede kólik keptelisi týyndaıdy. Endi qurylysy bastalǵan «Soltústik aınalma jol» osyndaı máseleniń túıinin sheshedi», - dep habarlady Nurlan Jantýrın.
Onyń málimetine súıensek, Jaıyq ózeniniń oń jaǵalaýyndaǵy «Atyraý – Oral» respýblıkalyq tasjolynyń 10-shy jáne sol jaǵalaýdaǵy «Atyraý – Inder» oblystyq jolynyń 9-shy shaqyrymyn qosý úshin kópir salynady. Aınalma joldyń uzyndyǵy – 26 shaqyrym.
«Eki kúre jolmen qıylysatyn 2 jolaıyryǵy men ózen ústinen 1 kópir salynady. Qazir fılıaldyń mamandary jol qurylysyna paıdalanylatyn topyraq qabatynan synama aldy. Synama zerthanada tekseriledi», - dep málim etti Nurlan Jantýrın.
Ekinshi kategorııaǵa jatqyzylǵan 1 jolaqty jolǵa «QazAvtoJol» kompanııasy tapsyrys bergen. Al merdiger retinde «Azvırt» pen «Aqjol qurylys» kompanııalary tańdalǵan. Jol qurylysyn 2024 jyldyń sońyna taman aıaqtaý kózdelgen.
Eske salaıyq, budan buryn Atyraýdan Reseıge qatynaıtyn joldyń eki ýchaskesinde qurylys jumysy aıaqtalǵanyn habarlaǵan bolatynbyz.
