Atyraý oblysynda «Jasyl El» jasaǵynyń sany artady
ATYRAÝ. QazAqparat - Atyraý oblysynda aldaǵy jazda tek stýdentterden emes, sondaı-aq jumyssyz jastardan qurylǵan «Jasyl El» jasaǵynyń sany artady, dep habarlaıdy «QazAqparat» HAA tilshisi.
«Jasyl Elge» tartylatyn jastar sany úsh esege deıin artady - 2016 jyly 600 adam bolsa, aǵymdaǵy jyly 2 myńǵa deıin jetedi. Mamyr aıynda jumyssyz jastardan quralǵan jasaqtar óz jumysyn bastasa, maýsym aıynan bastap stýdentter jasaǵy kelip qosylady. Tek adamdar sanyn arttyryp qana qoımaı, olardyń jalaqylaryn da kóbeıttik. Eger buryn olardyń eńbekaqysy 47 myń teńge kóleminde bolsa, bıylǵy jyly salyqtar men áleýmettik aýdarymdardy qosa eseptegende 60 myń teńge alatyn bolady. Oblys ákimi baǵdarlamaǵa qoldaý kórsetip, jergilikti bıýdjetten transfert arqyly qarjy kólemin arttyrýǵa tapsyrma berdi. Osylaısha, 2017 jyly Atyraý oblysynda «Jasyl El» baǵdarlamasy aıasynda jastardy jumyspen qamtamasyz etý úshin 140 mln teńge bólinip, onyń 39-y - respýblıkalyq bıýdjetten, 101 mıllıony - jergilikti bıýdjetten berildi», - dep málimdedi Atyraý oblystyq jastar saıasaty máseleleri jónindegi basqarma basshysy Jasulan Bısembaev.
