Atyraý oblysynda jastarǵa terrorızmdi nasıhattaǵan 4 adamdyq top ustaldy
Oblystyq polıtsııa departamentiniń baspasóz qyzmetinen málim etkendeı, top quramynda Qurmanǵazy aýdanynyń 4 adamy bolǵan.
«Ekstremızmge qarsy is-qımyl basqarmasynyń, Qurmanǵazy aýdandyq polıtsııa bólimi men «Arlan» arnaıy jasaǵynyń qyzmetkerleri 16 maýsym kúni saǵat 7:30 shamasynda terrorızmdi nasıhattady degen kúdikke ilingen 4 adamdy ustady. Kúdiktiler – Qurmanǵazy aýdanynyń 39, 35 jáne 33 jastaǵy turǵyndary. Ustalǵan kúdiktilerdiń bári Qurmanǵazy aýdanynyń jastaryna teris jat aǵymnyń ilimin nasıhattaǵany úshin baqylaýǵa alynǵan. Olardyń turǵylyqty mekenjaılaryn tekserý kezinde Qazaqstan aýmaǵynda taratýǵa tıym salynǵan dinı ádebıetter men túrli nasıhattyq jadynamalar, uıaly telefondar men 2 pyshaq tárkilendi. Aıǵaq zattardyń bári qylmystyq iske tirkeldi», -dep habarlady departamenttiń baspasóz qyzmeti.
Qazir polıtsııa qyzmetkerleri ustalǵan kúdiktilerge qatysty QR Qylmystyq kodeksiniń 256-babymen (Terrorızmdi nasıhattaý nemese terrorızm aktisin jasaýǵa jarııa túrde shaqyrý) sotqa deıingi tergeý amaldaryn bastady. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
Eske sala ketelik, buǵan deıin Atyraýda destrýktıvti dinı aǵym ókili turatyn úıdiń aýlasynan marıhýana tabylǵanyn habarlaǵan edik.
Destrýktıvti dinı aǵymdy ustanatyn 2000 jylǵy turǵynnyń Atyraý qalasyndaǵy úıiniń aýlasyna tekserý is-sharasyn júrgizdi. Tekserý kezinde jalpy salmaǵy 90,2 grammdy quraıtyn marıhýana esirtki zatyn tárkiledi. Destrýktıvti dinı aǵym ókiliniń buryn sottalǵany anyqtaldy.
