Atyraý oblysynda jasóspirimniń ólimine sebepker bolǵan qart júrgizýshi sottaldy
Jylyoı aýdandyq sotynda jasóspirimdi qaǵyp, mert qylǵan 73 jastaǵy júrgizýshige qatysty qylmystyq is qaraldy. Júrgizýshi QR Qylmystyq kodeksiniń 345-babynyń 3-bóligimen aıyptalǵan.
«Ótken jylǵy 20 qazanda saǵat 7.40 shamasynda júrgizýshi kámeletke tolmaǵan jaıaý júrginshini qaǵyp ketken. Jol-kólik oqıǵasynan jasóspirim oqıǵa ornynda qaıtys bolǵan. Sottalýshynyń kinási sot-saraptama qorytyndysymen, jol-kólik oqıǵasy ornynyń beınejazbasymen tolyq dálelin tapty», - dep habarlady aýdandyq sottyń baspasóz qyzmeti.
Prokýror sottalýshyǵa 5 jyl merzimge kólik quraldaryn basqarý quqyǵynan, 2 jyl merzimge bas bostandyǵynan aıyrý jazasyn taǵaıyndaýdy suraǵan. Sottalýshy óz kinásin tolyq moıyndaǵan.
«Sot jaza taǵaıyndaý barysynda aıyptalýshynyń qylmystyq jaýaptylyǵy men jazasyn jeńildetetin mán-jaılar retinde onyń buryn sotty bolmaǵanyn, 73 jasta ekenin, densaýlyq jaǵdaıyn, jábirlenýshi tarapqa keltirilgen materıaldyq zalaldyń ótelgenin eskerdi. Júrgizýshi sot úkimimen QR Qylmystyq kodeksiniń 345-babynyń 3-bóligimen kináli dep tanylyp, oǵan 3 jyl merzimge kólik quraldaryn basqarý quqyǵynan, 2 jyl 6 aı merzimge bas bostandyǵynan aıyrý jazasy taǵaıyndaldy. Atalǵan qujattyń 63-babynyń negizinde 2 jyl 6 aı merzimge shartty jazaǵa sottaldy», - dep málim etti sottyń baspasóz qyzmetinen.
Sottalýshydan jábirlenýshi taraptyń paıdasyna 5 mln teńge moraldyq zııan ótemaqysy óndirilgen.
Sot úkimi zańdy kúshine engen joq.
Eske sala ketelik, buǵan deıin Atyraý oblysynda 5 adam mert bolǵan jol apatyna kináli júrgizýshi sottalǵanyn jazǵan edik.
