Atyraý oblysynda jasóspirim shabandoz alaman báıgede oza shaýyp, kólik mindi
ASTANA. QazAqparat - Atyraý oblysynyń Mahambet aýdanynda alaman báıge jáne kókpar tartý jarysy ótti, dep habarlaıdy oblystyq ákimdiktiń baspasóz qyzmeti.
Báıgege 100 at qatysty, olar BQO, Mańǵystaý, Aqtóbe jáne Atyraý oblystarynan keldi. Sharaǵa 3 myńdaı adam jınaldy.
Adamdar negizgi doda - alaman báıgeden basqa túrli sporttyq sharalardy tamashalady. Sondaı-aq ulttyq as túrleri jaıylǵan dastarhannan dám tatty. Sharany Mahambet aýdanynyń ákimdigi uıymdastyrdy.
«Bul dodany biz Jeńistiń 72 jyldyǵyna oraı uıymdastyrdyq, - dedi Mahambet aýdanynyń ákimi Álımuhamed Quttymuratuly. - Bizdi aýdan turǵyndary qoldady, olar syılyq qoryn toltyrýǵa kómektesti».
Alaman báıgede 1-oryndy mańǵystaýlyq 14 jasar Baǵdaýlet Meńdibaev ıelendi. Ol alǵashqy kóligin 11 jasynda jeńip alǵan ákki shabandoz. Al bul jolǵy jeńisi úshin oǵan «Ýaz - Patrıot» kóligi tartý etildi. Óziniń aıtýynsha, bul onyń sońǵy úsh jylda ıelengen úshinshi avtokóligi.
Báıgeniń kúmis jáne qola júldegerleri 700 jáne 400 myń teńgeden syıaqy aldy.
Kókpar tartý jarysynan Mahambet aýdanynyń komandasy bárinen myqty bolyp shyqty. Olar 400 myń teńge syıaqyny utyp aldy.
