Atyraý oblysynda jas kásipker sabyn shyǵaratyn tseh ashty
Bul kásipti «Altyn» jeke kásipkerliginiń dırektory Altynbek Dúısembıev bıyl bastaǵan. Jas kásipker Inder aýdanynda turady.
«Búgin – el Táýelsizdiginiń 30 jyldyq merekesi. Osy jyldar ishinde elimizde oń ózgerister bolyp, jetistikterge qol jetti. Otandyq ekonomıkanyń ár salasy qarqyndy damyp keledi. Onyń ishinde shaǵyn jáne orta bıznes te bar. Osy salany órkendetýge úlesimdi qosýǵa bel baıladym. Sóıtip, 4 mln 700 myń teńge kóleminde qaıtarymsyz grant aldym», -deıdi Altynbek Dúısembıev.
Onyń aıtýynsha, sabyn shyǵarý úshin biraz izdenýine týra kelgen. Shaǵyn tseh ashyp, arnaıy qurylǵylardy satyp alǵan.
«Kir sabyn qospasynyń basym bóligi – kádimgi kúnbaǵys pen maldyń ish maıy. Aýyldaǵy fastfýt daıyndaıtyn dúńgirshekterden qaınatylǵan kúnbaǵys maıyn jınaımyz. Ony arnaıy ydysta qaıtadan qaınatyp, úlken qazanǵa quıamyz. Qazandaǵy maıǵa qospalaryn qosyp, ábden aralastyramyz. Qoımaljyń qospa nyǵyzdalyp, arnaıy pishinge keltiretin qurylǵyǵa aýystyrylady. Kádimgi kir sabyn osylaı daıyndalady», -deıdi ol.
Endi ol qaıtarymsyz grant qarjysyna taǵy jańa qurylǵylar alýdy kózdep otyr.
«Táýelsizdiktiń nátıjesinde jeke kásibimizdi qolǵa aldyq. Memleket tarapynan kásibimizdi keńeıtýge qoldaý kórestilip jatyr. Bul kásipkerlerdi jańa jumys oryndaryn ashýǵa yntalandyrady», -deıdi Altynbek Dúısembıev.
Eske sala ketelik, buǵan deıin Atyraý oblysynda qurǵaq qurylys qospalaryn shyǵaratyn tseh iske qosylǵanyn jazǵan bolatynbyz.