Atyraý oblysynda jappaı tártipsizdikke qatysqan 497 adam ustaldy
Atyraý oblysynyń komendanty – oblystyq polıtsııa departamentiniń bastyǵy Qamza Úmbetqalıevtiń aıtýynsha, jappaı tártipsizdik kezinde buzaqy toptar tarapynan
polıtsııa qyzmetkerleri men áskerılerge qarsy kúsh qoldanylyp, qorǵanys quraldaryn tartyp alý derekteri tirkelgen.
«Tótenshe jaǵdaı kezinde júrgizilgen jedel is-sharalar nátıjesinde blok beketterden 10-nan astam ańshy pyshaǵy, Atyraý qalasynyń aýmaǵynda 5 adamnan 896 tabletka túrindegi, 236 ampýla túrindegi, 150 tútikke salynǵan ýyttylyq áseri joǵary psıhotroptyq dáriler men 2 tapansha tárkilendi. Jappaı tártipsizdikke qatysqan 497 adam anyqtalyp, ishki ister organdaryna jetkizildi. Ustalǵan kúdiktilerge qatysty tergeý amaldary júrgizilýde.
Sondaı-aq, aımaqta antıterrorlyq operatsııa jalǵasyp jatyr. Soǵan qaramastan túngi saǵat 23:00-den tańǵy saǵat 7:00-ge deıin komendanttyq saǵat talaptaryn buzǵan 137 derek tirkeldi. Osyǵan baılanysty ákimshilik is qozǵalyp, jaýapkershilikke tartyldy», -deıdi Atyraý oblysynyń komendanty Qamza Úmbetqalıev.
Oblys komendanty tótenshe jaǵdaıǵa baılanysty tártip saqshylary men ózge de jaýapty mamandardyń jumysyna túsinistikpen qaraýǵa, terrorızmge qarsy operatsııalar kezindegi shekteýlerge sabyrlyq tanytyp, saqtyq sharalaryn saqtaýǵa shaqyrdy.
Eske sala ketelik, buǵan deıin Atyraý oblysynda komendanttyq saǵat talaby 121 márte buzylǵanyn habarlaǵan edik. Sondaı-aq, esirtki jarnamalaıtyn 17 saıt buǵattalǵan bolatyn.
