Atyraý oblysynda janarmaı tasıtyn kóliktiń 27 jastaǵy júrgizýshisi joǵalyp ketti
ATYRAÝ. QazAqparat – Atyraý oblysynda janarmaı tasıtyn kóliktiń 27 jastaǵy júrgizýshisi joǵalyp ketti, dep habarlaıdy QazAqparat.
Oblystyq tótenshe jaǵdaılar departamenti baspasóz qyzmetiniń aqparatyna qaraǵanda, «Ýral» kóliginiń júrgizýshisi 12 aqpanda ken ornyna barý úshin jolǵa shyǵyp ketken.
«Biraq, Atyraý qalasynan jolǵa shyqqan júrgizýshiniń Maqat aýdanyndaǵy «Qaratal» ken ornyna jetpegeni anyqtalyp otyr. Bul týraly departamenttiń dıspetcherlik pýltine búgin, 14 aqpanda saǵat 01:30-da habar tústi. Kólik júrgizýshisiniń jasy – 27-de. Ol «Arna» JShS-de janarmaı tasıtyn «Ýral» kóligin júrgizýshi bolyp jumys isteıdi. Ony izdestirý jumystary búgin, 14 aqpanda túnde bastaldy», -dep habarlady departamenttiń baspasóz qyzmeti.
Joǵalǵan júrgizýshini izdestirýge túnde №8 órt sóndirý bóliminen 3 qyzmetkeri men 1 «ÝAZ» kóligi men týystary jumyldyryldy. Al, tańerteń saǵat 06:20-da jedel-qutqarý jasaǵynyń 3 qutqarýshysy men 1 «TREKOL» jol talǵamaıtyn kóligi, «Arna» JShS-niń 3 qyzmetkeri men 1 tehnıka, sondaı-aq, týystary qosyldy.
«Іzdestirý jumystary Maqat aýdanyndaǵy Dossor kentinen 40 shaqyrym jerde jalǵasyp jatyr. «Qaratal» ken ornyna jaqyn mańda áýeden izdestirýge sheshim qablydandy. Sol sebepten, oǵan «Qazavıaqutqarý» AQ-na qarasty MI-8 tikushaǵy ekıpajynyń 4 múshesi, tótenshe jaǵdaılar departamentiniń 3 qyzmetkeri, týystarynan 3 adam tartyldy. Ázirge izdestirý jumystary nátıje bergen joq», -dep málim etti departamenttiń baspasóz qyzmetinen.
Eske sala ketelik, buǵan deıin Atyraý oblysynda 66 jastaǵy er adam joǵalyp ketkenin jazǵan bolatynbyz.
