Atyraý oblysynda jaǵdaıy aýyr 12 naýqas jansaqtaý bóliminde jatyr
Oblystyq densaýlyq saqtaý basqarmasy baspasóz qyzmetiniń málimetinshe, koronavırýs ınfektsııasyn juqtyrǵan 137 adam oqshaýlanǵan.
«Onyń ishinde 75 adam úı jaǵdaıynda emdelý, 580 tósek-orny bar ınfektsııalyq statsıonarlarǵa 62 naýqas (júkteme – 10,7%) hattamaǵa sáıkes em-dom qabyldaý úshin jatqyzyldy. Qazir modýldik aýrýhanada – 45, aýdandardaǵy ınfektsııalyq statsıonarlarda – 14, ftızıopýlmanologııalyq ortalyqta 3 naýqas jatyr. Jylyoı aýdanynda ornalasqan Teńiz kenishindegi statsıonarǵa koronavırýspen jatqan naýqastar túsken joq», -dep habarlady basqarmanyń baspasóz qyzmeti.
Ótken táýlikte qaýipti vırýsqa shaldyqqan 6 naýqas tirkelgen. Atyraý qalasynda Covid-19 ınfektsııasyn juqtyrýdyń 5 jaǵdaıy rastalǵan. Al, Jylyoı aýdanynda 1, Qurmanǵazy aýdanynda 1 naýqas anyqtalǵan.
«Qazir ınfektsııalyq statsıonarlardaǵy 58 oryndyq jansaqtaý bóliminde koronavırýs ınfektsııasymen jatqan 12 naýqastyń jaǵdaıy aýyr. Onyń ishinde jaǵdaıy óte aýyr 3 patsıent ókpeni jasandy jeldetý apparatyna qosylǵan. Bul bólimdegi júkteme – 22,4%», dep málim etti basqarmanyń baspasóz qyzmetinen.
Eske sala ketelik, buǵan deıin Atyraý oblysyndaǵy Teńiz kenishinde koronavırýspen aýyrǵan naýqastar joq ekenin jazǵan edik.