Atyraý oblysynda úsh jerge munaı ónimderi tárizdes suıyqtyq tógilgeni anyqtaldy
Oblystyq ekologııa departamentiniń baspasóz qyzmetinen málim etkendeı, munaı ónimderine uqsas suıyqtyq Isataı aýdanyndaǵy Janbaı aýylynyń mańyna tógilgen.
«Atyraý oblysy boıynsha ekologııa departamentimniń mamandary áleýmettik jelige júktelgen vıdeo, fotolarǵa udaıy monıtorıng júrgizip otyrady. Sondaı monıtorıngtiń biri 17 qyrkúıekte júrgizilip, munaı ónimderi tárizdes suıyqtyq tógilgen jerlerge nazar aýdaryldy», -dep habarlady departamenttiń baspasóz qyzmeti.
Keıin departament mamandary belgisiz bireýlerdiń Isataı aýdanyndaǵy Janbaı aýylynan 3 shaqyrym qashyqta munaı ónimderi tárizdes suıyqtyqty ashyq dalaǵa tógip ketkenin anyqtady. Jedel áreket etý maqsatynda departament mamandary atalǵan orynǵa baryp, tekserý jumystaryn júrgizdi.
«Tekserý kezinde munaı ónimderi tárizdes suıyqtyq tógilgen úsh aýmaq anyqtaldy. Búlingen jerdiń jalpy aýdany 323 sharshy metrdi qurady. Qorshaǵan ortaǵa zııan keltirgenderdiń zańsyz áreketinten búlingen úsh aýmaqtan zerthanalyq taldaý jumystary júrgiziledi. Osy maqsatta lastanǵan topyraqtan synamalar alyndy», -dep málim etti departamenttiń baspasóz qyzmetinen.
Qazir tabıǵatty búldirý deregi boıynsha qaraý aktisi jasaqtaldy. Búlingen aýmaqtar foto jáne beınejazbaǵa túsirildi. Kináli adamdardy anyqtaý maqsatynda tıisti qujattar jınaqtalyp jatyr.
Eske sala ketelik, buǵan deıin Kaspıı jaǵalaýynda órtengen qamys tútininiń ıisi Atyraýda sezilip turǵanyn jazǵan bolatynbyz.