Atyraý oblysynda úsh myń páterli 44 kópqabatty úı salynady
Atyraý oblysynyń ákimi Nurlan Noǵaev, «Turǵyn úı qurylys jınaq banki» AQ basqarma tóraǵasy Lázzat Ibragımova jáne «Atyraý» ÁKK basshysy Marat Túsipqalıev yntymaqtastyq týraly memorandýmǵa qol qoıdy.
Bul kelisimshart boıynsha 2019 jyly tapsyrylatyn 297 páterge arnalǵan 4 nysannyń qurylysy bastalady. Budan basqa, Atyraý oblysynyń turǵyndaryn baspanamen qamtý úshin birqatar memorandýmdarǵa qol qoıyldy.
Atyraý oblysynyń ákimi Nurlan Noǵaev aımaq halqyn turǵyn úımen qamtamasyz etý boıynsha júrgizilip jatqan jumystar jóninde áńgimeledi.
«Oblysta 3 myń páterli 44 kópqabatty úı salynady. Jyl sońyna deıin 2000 páterge arnalǵan 34 kópqabatty úı paıdalanýǵa beriledi. Aıta ketý kerek, «7-20-25» memlekettik baǵdarlamasyna qyzyǵýshylyq tanytyp otyrǵandar az emes. Jyl basynan beri 59 ótinim kelip túsken, onyń 34-i maquldandy»,- dedi oblys ákimi.
Budan basqa, jasalǵan memorandýmdar aıasynda «Nursaıa» yqsham aýdanynda 100 páterlik turǵyn úıler qurylysy júrgiziledi. Sondaı-aq, «Nurly jer» baǵdarlamasy boıynsha «Nursaıa» jáne «Bereke» aýdandarynda 21 turǵyn úı salynady.
Odan bólek, «Nurly jer» baǵdarlamasy aıasynda «Talǵaıran» yqshamaýdanynda 80 jeke menshik úı salynady. Olardyń aýdany 64 - 191 sharshy metr, úıler bir jáne eki qabatty. 1 sharshy metrdiń turǵyn úı baǵasy - 120 000 teńge.
Sonymen birge, áleýetti satyp alýshylar jer ýchaskesin alý úshin jergilikti ákimdikte tirkeýde bolýy tıis.
«Nurly jer» baǵdarlamasynyń qatysýshysy atanyp, turǵyn úıdi satyp alý úshin TQJB esebinde 20% bastapqy jarna bolsa, jetkilikti. Aıtalyq, 1 bólmeli páterdiń qunyn 7 mıllıon teńge dep alsaq, onda depozıtke 1,4 mıllıon teńge jınaý kerek. Sodan keıin bank jeńildetilgen nesıeni jyldyq 5% mólsherlememen beredi»,-dep málimdedi Turǵyn úı qurylys jınaq bankiniń tóraǵasy Lázzat Ibragımova.
