Atyraý oblysynda úsh kúnde jol erejesi 1800 márte buzylǵan
ATYRAÝ. QazAqparat – Atyraýda úsh kúnde kólik júrgizýshileri jol erejesin 1839 ret buzǵan, dep habarlaıdy QazAqparat.
Oblystyq polıtsııa departamenti baspasóz qyzmetiniń málmetinshe, sońǵy úsh kúnde shaharda «Qaýipsiz jol» aktsııasy ótkizilgen.
«Jalpy, úsh kúndik aktsııa kezinde oblysta 1839 jol qozǵalysy erejesin buzý deregi anyqtaldy. Onyń ishinde 366 - jyldamdyqty arttyrý, 288 - qaýipsizdik belbeýin taqpaý, 174 - kólik júrgizý kezinde uıaly telefondy paıdalaný derekteri. Sondaı-aq, tehnıkalyq baıqaýdan ótpegen 100 kólik anyqtalyp, ákimshilik hattama toltyryldy. Kólikti mas kúıinde basqarǵan 17 júrgizýshi ustaldy» dep habarlady departamenttiń baspasóz qyzmeti.
Eske sala ketelik, budan buryn Atyraýda nómirsiz júrgen 200-ge jýyq kólik anyqtalǵan bolatyn.
