Atyraý oblysynda úsh kúnde 449 sheteldik jaýapqa tartyldy
Oblystyq polıtsııa departamentiniń bastyǵy, polıtsııa polkovnıgi Qamza Úmbetqalıevtyń málimetinshe, 6 jeltoqsan beri «Mıgrant» jedel profılaktıkalyq is-sharasy ótip jatyr.
«Polıtsııa qyzmetkerleri is-sharasy bastalǵannan bergi 3 kúnde shetelden kelgen 449 azamattyń kóshi-qon zańnamasyn buzǵanyn anyqtady. Shetel azamatyn shaqyrýdyń belgilengen qaǵıdalaryn buzǵany úshin 124 azamat ákimshilik jaýapqa tartyldy. Sondaı-aq, 10 jumys berýshiniń sheteldik jumys kúshin zańsyz paıdalanǵany belgili boldy. Al, 12 shetel azamatyna qatysty sot Qazaqstan Respýblıkasy aýmaǵynan tys shyǵaryp jiberý týraly sheshim qabyldady. Sonymen qatar, oblys aýmaǵynda Tájikstan Respýblıkasy azamatynyń «Memlekettik shekarany qasaqana zańsyz kesip ótýi» deregi anyqtalyp, is-qujattar jınaqtalýda», - dedi Qamza Úmbetqalıev.
Onyń aıtýynsha, «Mıgrant» jedel-profılaktıkalyq is-sharasy 12 jeltoqsanǵa deıin jalǵasady.
Eske sala ketelik, budan buryn Atyraý oblysynda 23 úıge urlyqqa túsken qylmystyq top músheleri sottalǵanyn jazǵan edik.