Atyraý oblysynda úsh kásiporyn 21,5 mln teńge jalaqyny tóleı almaı otyr
Oblys ákiminiń baspasóz qyzmetinen málim etkendeı, bul týraly áleýmettik áriptestik pen eńbek qatynastaryn retteý jónindegi oblystyq komıssııa otyrysynda belgili bolǵan.
Atyraý oblysynyń ákimi Mahambet Dosmuhambetovtiń tórǵalyǵymen ótken otyrysqa jumys berýshi jáne jalaqy qaryzy bar kompanııalardyń basshylary qatysty.
Oblystyq memlekettik eńbek ınspektsııa basqarmasynyń basshysy Igilik Áýbákirovtiń málimetinshe, byltyr 83 kásiporynnyń 1 388 qyzmetkerge 469,3 mln teńge jalaqy qaryzy bolǵan.
«Osyǵan baılanysty tıisti sharalar qabyldanyp, 80 kásiporynnyń 1 212 jumyskerge tólenýi tıis 447,8 mln teńge jalaqy bereshegi óteldi. Qazir 3 kásiporyn 176 qyzmetkerge 21,5 mln teńge jalaqysyn tóleı almaı otyr. Byltyr 45 jumysshy ár túrli dene jaraqatyn aldy», -deıdi Igilik Áýbákirov.
Komıssııa otyrysynda oblys ákimi Mahambet Dosmuhambetov jaýapty tulǵalarǵa birqatar tapsyrma berdi.
«Barlyq kásiporyn, merdiger, qosalqy merdiger kompanııalardyń basshylary jalaqy qaryzy qalyptasýyna jol bermeýi qajet. Mundaı zań buzýshylyqtardy boldyrmaýdy baqylaýda ustaýdy tapsyramyn», -dedi ákim.
Eske sala ketelik, budan buryn gaz jelisine qosylǵysy kelgen atyraýlyq kásipkerdiń ótinishi bir jyldan beri sheshimin tappaǵanyn jazǵan bolatynbyz.
