Atyraý oblysynda úsh aıda jol apatynan 25 adam mert boldy
Oblystyq polıtsııa departamentiniń baspasóz qyzmetinen málim etkendeı, jyl basynan beri 79 jol-kólik oqıǵasy tirkelgen.
«Bıylǵy úsh aıda 79 jol-kólik oqıǵasy tirkelip, 25 adam mert boldy. Al, 98 adam ártúrli dene jaraqatyn aldy. Shetelde tirkeýde turǵan kólik quraldary 32 jol apatyna sebepker boldy. Sonyń saldarynan 13 adam qaza taýyp, 38 adam zardap shekti. Jol-kólik oqıǵalarynyń negizgi sebepteri – eldi mekende qozǵalys jyldamdyǵyn arttyryp, qarsy baǵytqa shyǵý. Óńirde jol-kólik oqıǵasy kóp tirkeletin apattyq-qaýipti ýchaskeler anyqtaldy. Onyń ishinde «Dossor-Qulsary-Beıneý» tas jolynyń 18 shaqyrymy qaýipti aımaqqa jatady», -dep habarlady departamenttiń baspasóz qyzmeti.
Eske sala ketelik, buǵan deıin Atyraý oblysynda bir adam mert bolyp, júrgizýshi aýrýhanaǵa túskenin habarlaǵan edik.