Atyraý oblysynda ulttyq at sportynan batys aımaqtyq týrnır ótti
Oblystyq Sport jáne dene shynyqtyrý basqarmasynyń baspasóz qyzmetinen málim etkendeı, týrnır 12-13 qarashada Mahambet aýdanynyń Keńóris aýylynda ótti.
«Týrnırdiń júlde qory – 14 mln 500 myń teńge. Oǵan batys óńirlerinen kelgen sportshylar qatysty. Tartysty ótken dúbirli dodanyń nátıjesinde alaman báıge, kókpar saıysy men qunan báıgede oza shapqan myqtylar anyqtaldy», - dep málim etti basqarmanyń baspasóz qyzmetinen.
24 shaqyrymdyq alaman báıgede birinshi oryndy Mańǵystaý oblysynyń shashasyna shań juqpaǵan «Muzbalaq» atalǵan júırigi ıelenip, ıesi – Nysanbek Tańatarovqa 2 mln teńge berildi. Ekinshi júlde – 1 mln teńgege mańǵystaýlyq «Aqjaýynnyń» ıesi Eraly Ibashev ıe boldy. Márege úshinshi bolyp Batys Qazaqstan oblysynan Nurbek Saǵynbaevtyń «Qańtáńir» júırigi jetti. Tulpar ıesine 500 myń teńge tabys etildi.
Qunan báıgeniń qashyqtyǵy 9 shaqyrymdy qurady. Bul dodada bir-birimen aýyzdyq tiresken úsh júırik anyqtaldy. Máre syzyǵyn birinshi qıǵan – batysqazaqstandyq Bekzat Ómirǵalıevtyń júırigi. Jeńimpaz janýardyń ıesi 500 myń teńgeni ıelendi. Odan keıingi ekinshi júldeni Aqtóbe oblysynan qatysqan Nurlybek Balymbekovtiń qunany alyp, ıesi 300 myń teńgemen marapattaldy. Al úshinshi orynnyń 200 myń teńgesi Atyraý oblysynyń Jylyoı aýdanynyń turǵyny Aldońǵar Myrzaǵalıevke berildi.
Sondaı-aq, kókparshylardyń saıysy tartysty ótti. Bul dodada Mańǵystaý oblysynyń namysyn qorǵaǵan «Adaı ata» komandasy ózge komandalardan basym túsip, 3 mln teńge utyp aldy. Budan keıingi oryndardy Atyraý qalasynan qatysqan eki komanda ózara bólisti. Ekinshi oryn alǵan «Súleımen» komandasy 2 mln teńgeniń, úshinshi oryndy qanaǵat tutqan «Saraıshyq» komandasy 1 mln teńgeniń júldesin ıelendi.
Aıta keteıik, týrnırdi «Suleimen Promotions» JShS uıymdastyrdy. Oǵan Atyraý oblystyq Sport jáne dene shynyqtyrý basqarmasy men Mahambet aýdanynyń ákimdigi qoldaý bildirdi.
Budan buryn Atyraýda el Táýelsizdiginiń 30 jyldyǵyna oraı «Túıe palýandar» anyqtalǵanyn habarlaǵan bolatynbyz.
