Atyraý oblysynda Úkimet basshysy «Qashaǵan» jobasynyń birneshe nysandaryn aralady
ATYRAÝ. 22 qarasha. QazAqparat - Búgin jumys saparymen Atyraý oblysyna kelgen QR Premer-Mınıstri Serik Ahmetov aldymen Kaspıı teńiziniń aıdynynda ornalasqan jáne Qashaǵan jobasynyń ınfraqurylymdyq bóligi bolyp tabylatyn «D» jasandy aralyna bardy.
Bul týraly Úkimet basshysynyń baspasóz qyzmeti habarlady.
Serik Ahmetov araldyń paıdalaný-tehnıkalyq kesheniniń (PTK) tehnologııalyq jabdyqtaryn kórip, Qashaǵanda munaı men gazdy óndirýge qatysty daıyndyq jumystarynyń barysymen tanysty. PTK táýligine 450 myń barrelge deıin munaı óńdeýge eseptelgen.
Úkimet basshysy «Qashaǵan» jobasynyń taǵy bir nysany «Adjıp KKO» kompanııasynyń «Bolashaq» zaýytynyń qurylysyn da aralap kórdi.
Onda munaı men gazdy keshendi tasymaldaý jumystaryna ázirliktiń tehnologııalyq qyrlary jóninde, sondaı-aq zaýyttyń Qashaǵan ken ornynan taýarlyq munaıdy qabyldaýǵa daıyndyǵy týraly máseleler sóz boldy. Kásiporynda munaıdy sorǵytý, ony qospalardan tazartý, Qashaǵandy tájirıbelik-ónerkásiptik ıgerý barysynda munaıdy saqtaý jáne eksporttaý júzege asyrylatyn bolady. Zaýyt qýattylyǵy jyl saıyn 22,5 mln. tonna munaı men 6 mlrd. tekshe metr gazdy qaıta óńdeýge múmkindik beredi
