Atyraý oblysynda tuzdy kólge shıpajaı salý josparlanyp otyr
ATYRAÝ. QazAqparat - Atyraý oblysynyń Inder aýdanynda sýy tuzdy kólge shıpajaı salý josparlanyp otyr, dep habarlaıdy QazAqparat.
Ótken jyly qazaqstandyq ǵalymdar Reseıdiń medıtsınalyq bıologııa agenttigine qarasty kýrortologııa ǵylymı-zertteý ınstıtýtynyń ókilderimen birlesip, osy kól sýynyń quramyn zerttegen bolatyn.
Zertteý barysynda ǵalymdar tuzdy sýdyń balshyǵynyń túrli aýrýlardy emdeý múmkindiginiń óte joǵary ekendigin dáleldedi.
«Sýda óte mol kólemde kalıı, magnıı, brom, lıtı, tsezıı, rýbıdı, ıod jáne ózge de kóptegen hımııalyq elementter bar. Kýrortty aımaqtyń qurylýy Qazaqstannyń kýrortty-týrızm salasyna tyń serpin beredi»,-delingen ǵalymdardyń eńbekterinde.
Mamandardyń Inder aýdanynda shıpajaıdyń salynýyn jergilikti bılik ókilderi de qoldap otyr.
«Bul jerde josparlanǵan istiń júzege asýyna tejeý bolyp otyrǵan bir másele bar. Geologııa jáne jer qoınaýyn paıdalaný komıtetiniń málimetinshe, Úkimet qaýlysynda Inder aýdanyndaǵy tuzdy ózen qorǵalatyn nysanardyń tizimine jatady dep kórsetilgen. Sol sebepti shıpajaı salý máselesin júzege asyrý úshin ózendi osy nysandar tiziminen alý kerek. Sonda jer qoınaýyn paıdalaný quqyǵy men emdeý-saýyqtyrý ornynyń qurylysyna qajetti jer alýǵa múmkindik týady. Biz qazir osy baǵytta tıisti kelissózder júrgizip jatyrmyz»,-dedi oblys ákiminiń orynbasary Saǵyndyq Luqpanov óńirlik kommýnıkatsııalar qyzmetinde ótken baspasóz máslıhatynda.
