Atyraý oblysynda túske deıin 23 sábı ómirge keldi
Oblystyq densaýlyq saqtaý basqarmasy baspasóz qyzmetiniń málimetinshe, búgin, 10 qańtarda túske deıin 23 sábı ómir esigin ashqan. Onyń ishinde 13-i – ul, 10-y – qyz.
Saılaý kúninde náresteli bolǵannyń biri – jas ana Shynar Tóleýishova. Ol búgin ómirge tórtinshi sábıin ákeldi.
«Bizdiń otbasymyzda balalarǵa maǵynasy bólek erekshe esimder berý dástúri bar. Máselen, úshinshi qyzymyzdy Quralaı dep atadyq. Sebebi, qyzym kóktemgi tabıǵat qubylysy – Quralaı atalatyn amal kezinde dúnıege keldi. Búgingi saılaý kúninde dúnıege kelgen tórtinshi qyzymyzǵa esim tańdaýdy osy sharamen baılanystyrmaq oıymyz bar. Saılaý esimin bermeımiz. Biraq, qyzymyzǵa táýelsiz elimizdiń áleýmettik-ekonomıkalyq órkendeýine laıyqty úlesin qosyp júrgen isker ári saıasatker áıelderdiń biriniń esimimen ataýymyz múmkin. Al, búgin – Táýelsizdiktiń 30 jyldyǵyn atap ótkeli otyrǵan elimiz keleshegin búgingiden de kemeldendire túsýge tańdaý jasaıtyn tarıhı kúni. Sondyqtan, elimizdiń jańǵyrýymen birge qyzymyzdyń da bolashaǵy jarqyn bolaryna senemin», - deıdi Shynar Tóleýishova.
