Atyraý oblysynda turǵyndardan 105 qarý tárkilendi
ATYRAÝ. QazAqparat – Atyraýda úıinde qarýy bar 4 myńnan astam adam tekserilip, 105 qarý tárkilendi, dep habarlaıdy QazAqparat.
Oblystyq polıtsııa departamenti bastyǵynyń birinshi orynbasary Amangeldi Beriktiń málim etýinshe, 6 804 turǵynnyń atyna qarý tirkelgen. Atyraýlyq polıtseıler «Ýchaske» jedel is-sharasy kezinde 4 455 turǵynnyń qarýyn teksergen.
«Ýchaskelik ınspektorlar azamattyq qarýdy saqtaý, alyp júrý erejesin buzǵan 148 derekti anyqtady. Qarý saqtaý erejesin buzǵan 53 azamat QR Ákimshilik quqyqbuzýshylyq týraly kodekstiń 484-babymen, 95-i 486-bappen ákimshilik jaýapkershilikke tartyldy. Ákimshilik quqyqbuzýshylyqtar úshin 105, onyń ishinde zańsyz saqtalǵan 13 qarý tárkilendi», - dep málim etti Amangeldi Berik.
Onyń aıtýynsha, Inder aýdanynyń ortalyǵynda turatyn 62 jastaǵy turǵynǵa qatysty QR Ákimshilik quqyqbuzýshylyq týraly kodekstiń 484-babynyń 1-bóligimen ákimshilik hattama toltyrylyp, aıyppul salynǵan. Al, qarýdy zańsyz saqtaǵan Eltaı aýylynyń turǵynyna atalǵan kodekstiń 482-babymen toltyrylǵan ákimshilik hattama aýdandyq sotqa joldanǵan.
Sondaı-aq, Qyzylqoǵa aýdanyndaǵy eki sharýa qojalyǵynyń 34 jáne 25 jastaǵy ıelerinen qujaty joq, ári tirkelmegen, 16 mm kalıbrli qarýlar tárkilengen.
Eske sala ketelik, atyraýlyqtar polıtsııaǵa 40-qa jýyq qarý men 100-den astam oq-dári tapsyrdy.
