Atyraý oblysynda tumaýǵa qarsy vaktsınalaý bastaldy
ATYRAÝ. QazAqparat – Búgin Atyraý oblysynda tumaýǵa qarsy vaktsına salý bastaldy. Bul týraly oblystyq Densaýlyq saqtaý basqarmasynyń baspasóz qyzmetinen málim etti, dep habarlaıdy QazAqparat.
№1 Atyraý qalalyq emhanasy bas dárigeriniń orynbasary Aınagúl Shaýmovanyń aıtýynsha, tegin vaktsına jasy alty aıdan asqan balalarǵa, júkti áıelderge, medıtsına qyzmetkerlerine jáne sozylmaly syrqatpen dıspanserlik esepte turǵan naýqastarǵa, jasy 60-tan asqan egde adamdarǵa salynady.
«Al, mekemeler tarapynan aqyly túrde ekpe alýǵa ótinishti jergilikti emhanalar arqyly berýge bolady. Tumaýǵa qarsy salynatyn vaktsına Reseıden shyǵarylǵan. «Grıppol+» dep atalatyn vaktsınany ótken jyldan beri qoldanyp kelemiz. Byltyr oblysqa 30 myń vaktsına jetkizilse, bıylǵa 60 myń doza ekpe ákelindi. Vaktsına quramy qarapaıym, tumaýdyń A(H3N2), A(H1N1) jáne V antıgenderi ǵana bar. Sondyqtan, ekpeni qoryqpaı alýǵa bolady», - deıdi Aınagúl Shaýmova.
Oblystyq Densaýlyq saqtaý basqarmasy tamaq aýyrý, álsizdik, túshkirý, ystyq kóterilý sekildi tumaýdyń alǵashqy belgileri bilingen boıda jergilikti emhanaǵa qaralýǵa keńes beredi. Sebebi, kún sýytqan mezgilde vırýstyq juqpaly aýrýlardyń taralý qaýpi joǵarylaıdy.
