Atyraý oblysynda tumaý juqtyrǵandardyń deni - júkti áıelder
Oblystyq densaýlyq saqtaý basqarmasy baspasóz qyzmetiniń aqparatyna qaraǵanda, bıyl tumaýǵa qarsy «Grıppol+» vaktsınasynyń 65 myń dozasy satyp alynǵan. Bul – Reseı Federatsııasynda shyǵarylǵan vaktsına.
Bıyl 7 adamnyń tumaýǵa shaldyqqany anyqtalyp otyr. Onyń ishinde 5 júkti áıel, 2 eresek turǵyn bar.
«Jiti respıratorlyq vırýstyq ınfektsııadan ásirese, tumaýdan saqtanýdyń eń tıimdi joly – vaktsına saldyrý. Bes jasqa deıingi balalar men 65 jastan asqan qarııalar, júkti áıelder men sozylmaly syrqaty bar adamdar, ásirese, qan tamyrlary, tynys alý organdary, sýsaqqa shaldyqqandar tumaýdyń asqynǵan túrimen aýyrýy múmkin. Óıtkeni, mundaı adamdarda ımmýnıtet qorǵanyshy tómendeıdi. Sol sebepten, tumaý juqtyrýy múmkin. Al, tumaýǵa shaldyqpaý úshin oǵan qarsy shyǵarylǵan vaktsınany der mezgililinde saldyrý kerek. Bul – eń tıimdi ári senimdi tásil», -deıdi №4 Atyraý qalalyq emhanasynyń dáriger-epıdemıology Tilepbergen Hamzın.
Jyl saıyn tumaýǵa qarsy ekpeni saldyratyn turǵynnyń biri – Balqııa Álenova. Bıyl da tumaý juqtyrmaý úshin vaktsına alýdan bas tartpaǵan.
«Tumaý ózge aýrýlardy qozdyryp, túrli syrqatqa ushyratatyn juqpaly vırýs ǵoı. Sol sebepten, tumaýǵa qarsy ekpe alýdy ádetke aınaldyryp kelemin. Bul ózimniń ǵana emes, otbasymnyń da saýlyǵyn qorǵaýǵa kómektesedi», -deıdi Balqııa Álenova.
Eske sala ketelik, budan buryn Atyraý oblysynda ekpe alýdan bas tartqan eki adam kókjótel juqtyryp alǵanyn jazǵan bolatynbyz.