Atyraý oblysynda tórtinshi «Ashyq ákimdik» ashyldy
Mahambet aýdanynyń ákimi Járdemǵalı Ahmetovtiń málim etýinshe, endi munda turǵyndar sáýlet, jer qatynastary, bilim, jumyspen qamtý jáne áleýmettik baǵdarlamalar, azamattyq hal aktilerin tirkeý, aýyl sharýashylyǵy, turǵyn úı qatynastary máseleleri sheshimin tabady.
Servıstik ákimdikte halyqqa qyzmet kórsetý ortalyǵy men «Qazposhta» ókilderi de qyzmet kórsetedi. Sondaı-aq, turǵyndar qajetti qyzmetke júginý úshin elektrondy kezekke turady.
«Men endi turǵyndardy servıstik ákimdikte qabyldaımyn. Budan bylaı aýdan turǵyndaryna ákimdikke barýdyń qajeti joq. «Ashyq ákimdik» keńsesinde olarǵa kedergisiz qyzmet kórsetiledi», - deıdi Járdemǵalı Ahmetov.
QR Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń birinshi orynbasary Aıdos Mamyttyń aıtýynsha, servıstik ákimdik «halyq kúnine qulaq asatyn» memleket tujyrymdamasyn iske asyrý maqsatynda ashylyp otyr.
«Buǵan deıin servıstik ákimdiktiń front-keńseleri úsh aýdanda ashylǵan edi. Maqsat – bılik pen halyq arasyndaǵy baılanysty nyǵaıtyp, sapaly memlekettik qyzmet kórsetý. Sybaılas jemqorlyqtyń aldyn alyp, kórsetiletin memlekettik qyzmettiń ashyqtyǵyn qalyptastyrýda memlekettik qyzmetshilerdiń jaýapkershiligin arttyrý. Turǵyndar ákimdiktiń bólimderin izdep, ýaqytyn joǵaltpaýy kerek. Sol sebepten, «Ashyq ákimdiktiń» jumysy ashyq ári sapaly bolady» -deıdi Aıdos Mamyt.
«Ashyq ákimdik» keńsesinde ózine-ózi qyzmet kórsetý sektory men balalar alańy da bar.
