Atyraý oblysynda tórt aýyldan 17 myń tekshe metrge jýyq qyzyl sý sorylǵan

ATYRAÝ. QazAqparat – Atyraý oblysynda úsh táýlikte birneshe aýyldan 16 710 tekshe metr qar sýy sorylǵan, dep habarlaıdy QazAqparat tilshisi.

Oblystyq tótenshe jaǵdaılar departamenti qoǵammen baılanys tobynyń málimetinshe, sońǵy úsh táýlikte erigen qar sýyn sorý úzdiksiz júrgizilgen.

«Inder aýdanyndaǵy Jarsýat, Eltaı, Órlik aýyldarynyń kóshelerinde tereńdigi 60 sm bolatyn jańbyr men erigen qar sýy jınalǵan. Sońǵy úsh táýlikte – 6, 7, 8 naýryzda atalǵan aýyldardyń kóshelerinen 6 710 tekshe metr sý soryldy. Al, Qyzylqoǵa aýdanynyń ortalyǵy – Mııaly aýylyndaǵy eki úıdiń aýlasynan úsh táýlikte erigen qardyń 10 myń tekshe metr sý sorylyp alyndy», -dep habarlady departamenttiń qoǵammen baılanys tobynan.

Qyzylqoǵa aýdanynyń ákimi Qanat Ázmuhanovtyń deregine qaraǵanda, 7 naýryzǵa qaraǵan túni nóser jańbyr jaýǵan.

Jańbyr men erigen qardyń saldarynan Mııaly aýyldyq okrýginde sý deńgeıi kóterilgen. Bul aýylishilik sý basý qaýpin týyndatqan.

«Tolassyz jaýǵan jańbyr Saǵyz aýylynyń ortasymen ótetin Noǵaıty ózeniniń arnasyn toltyryp jiberdi. Sol sebepten ózen jaǵalaýyn bekitýge 80-nen astam turǵyn jumyldy. Qazir Noǵaıty ózenindegi sý deńgeıi birtindep tómendep keledi. Al Saǵyz ózeninde aǵys báseńdedi», -deıdi Qanat Ázmuhanov

Sý sorý jumysyna departamenttiń 21 qyzmetkeri jumylǵan.

Jergilikti atqarýshy organdardan 55 qyzmetker, «Qaınarmunaıgaz» basqarmasynan 3 adam kómekke kelgen. Sondaı-aq, 15 tehnıka men 6 motopompa tartylǵan.

Eske sala ketelik, budan buryn Atyraý oblysynyń birneshe aýylynda erigen qar sýy sorylyp jatqanyn habarlaǵan bolatynbyz.