Atyraý oblysynda teris aǵymdy ustanǵan 86 adam dástúrli dinge oraldy

ATYRAÝ. QazAqparat – Atyraý oblysynda teris aǵymdy ustanǵan 86 adam dástúrli dinge oralǵan, dep habarlaıdy QazAqparat.

Oblystyq Din isteri basqarmasynyń basshysy Qaırolla Kóshqalıevtiń aıtýynsha, bıylǵy alty aıda destrýktıvti dinı aǵymnyń 350 jaqtasymen 1 200 márte teologııalyq ońaltý is-sharasy júrgizilgen.

«Terrorızm jáne ekstremızm babymen sottalǵan 39 adammen 200 ret jeke kezdesý, 8 is-shara, 2 ıntelektýaldyq saıys ótkizildi. Sondaı-aq, teris aǵymnyń jeteginde júrgen 86 adam dástúrli dinı baǵytqa qaıtaryldy. Onyń ishinde 64 turǵyn, 8 jazasyn óteýshi, 5 stýdent bar. Al qalǵany – ekstremızm babymen jazasyn ótep shyqqandar, olardyń jubaılary, sondaı-aq probatsııalyq baqylaýdaǵy azamattar», - deıdi Qaırolla Kóshqalıev.

Eske salaıyq, buǵan deıin Atyraý oblysynda teris dinı aǵymdy nasıhattaǵan 40 adam jaýapqa tartylǵanyn jazǵan edik.

Budan bólek, óńirde 24 mln teńgeniń esirtkisin satpaq bolǵan dinı aǵym ókilderi ustalǵan bolatyn.