Atyraý oblysynda Táýelsizdik merekesi kúnderi 56 sábı ómirge keldi
ATYRAÝ. QazAqparat – Atyraý oblysynda Táýelsizdiktiń 30 jyldyq merekesi kúnderi 56 sábı ómirge keldi, dep habarlaıdy QazAqparat.
Atyraý qalalyq ákimdiginiń baspasóz qyzmetinen málim etkendeı, 16-17 jeltoqsanda dúnıe esigin ashqan shaqalaqtardyń arasynda 28 ul men 28 qyz bar.
«El Táýelsizdigine 30 jyl tolǵan mereke kúni – 16 jeltoqsanda 37 náreste ómirge keldi. Jas bosanǵan analarǵa merekelik kóńil-kúı syılaý úshin Atyraý qalalyq Jumyspen qamtý, áleýmettik baǵdarlamalar jáne azamattyq hal aktilerin tirkeý bólimi, «Azamattarǵa arnalǵan úkimet» memlekettik korporatsııasy» KeAQ-nyń Atyraý oblysy boıynsha fılıaly, oblystyq Densaýlyq saqtaý basqarmasy men «Qazposhta» AQ-nyń oblystyq fılıaly shaqalaqtardyń týýy týraly kýáligin jedel rásimdedi», - dep habarlady ákimdiktiń baspasóz qyzmetinen.
Táýelsizdik kúninde ómirge náreste ákelgen jas ananyń biri – Aıǵanym. Mahambet aýdanynda túratyn otbasy perzentine Fatıma esimin tańdaǵan.
«Biz úshin ulyq merekede sábıli bolý – úlken baqyt. Endi ákesiniń erke qyzy – Fatımamyz bar»,- deıdi ana.
Ata-anasyn zor qýanyshqa bólegen nárestelerge Ámire, Aıdaı, Aıshyn, Nurıslam, Nurseıit syndy esimder kóbirek qoıylǵan.
Eske salaıyq, 16-17 jeltoqsan – Táýelsizdik merekesi kúnderi dúnıege kelgen sábılerge baby-bokstar syıǵa tartylyp jatyr.
Táýelsizdiktiń 30 jyldyq mereıtoıyna oraı berilgen «Súıinshi» syıqorabyna bóbekterge qajetti zattardan basqa, QR Prezıdenti Qasym-Jomart Toqaevtyń quttyqtaý tilegi jazylǵan ashyq hat, «Táýelsiz Qazaqstanǵa 30 jyl» monetasy jáne balanyń týýy týraly kýáligi salynǵan. Erekshe jıyntyq qorap el boıynsha barlyǵy 2 myń balanyń ata-anasyna tapsyryldy.
