Atyraý oblysynda tartylyp jatqan kólderden balyq qutqarylýda

ATYRAÝ. QazAqparat – Atyraý oblysynyń Mahambet aýdanynda tartylyp jatqan kólderden balyq shabaǵy qutqarylýda, dep habarlaıdy QazAqparat tilshisi.

Oblystyq Balyq sharýashylyǵy basqarmasy baspasóz qyzmetiniń málimetinshe, Mahambet aýdanynda 18 kól bar. Onyń 8-inde ǵana sý bar. Sonyń biri – Aqtoǵaı aýyldyq okrýgi aýmaǵyndaǵy Baqsaı kólinde «Іnjý-marjan» JShS men «Qurmanǵazy» óndiristik kooperatıvi qyzmetkerleri balyq shabaqtaryn qutqarýdy qolǵa aldy.

«Qazir Mahambet aýdanynda ornalasqan «Baqsaı», «Petrýshkın», «Almaǵambet», «12 aýyl», «Kishi Qarashyǵanaq», «Qyzyljar», «15 aýyl», «Qorjyn» sý aıdyndary Jaıyq ózeninen tolyq úzilgen. Ór sýy qaıtqan mezgilden bastap, ıaǵnı maýsym jáne shilde aılarynda tabıǵat qutqarýshylardyń kómegimen 200 myńdaı balyq shabaǵy qutqarylǵan. Mamandar jaıylma sýdan aý quraldarynyń kómegimen sý astyndaǵy balyq shabaqtaryn súzip shyǵarady. Keıin arnaıy ydystarǵa salyp, tasymaldaý arqyly Jaıyq ózenine jiberedi», - deıdi Mahambet aýdandyq balyq ınspektsııasy bóliminiń basshysy Bekturǵan Supyǵalıev.

Onyń aıtýynsha, balyq shabaqtaryn qutqarý jumysyna «Іnjý-marjan», «Tilekshi», «Qyzylbalyq», «Kaspıı ryba Evrazııa», «Qurmanǵazy» jáne «Jambyl» mekemeleri tartylǵan. Qazir balyq shabaqtary usaq bolǵandyqtan, tamyz aıynda da qutqarý jumystary jalǵasady. Balyqtyń qyrylý qaýpi bar sý aıdyndary baqylaýǵa alynǵan.

Eske sala ketelik, budan buryn Atyraý oblysyda úsh aıda 1 myńnan asa tonna balyq qyrylǵanyn habarlaǵan edik.