Atyraý oblysynda tabıǵatty lastaýshylardan 104 mln teńge aıyppul óndirildi
Oblystyq ekologııa departamentiniń basshysy Álibek Bekmuhametovtiń málimetinshe, bıylǵy birinshi toqsanda ekologııalyq zańnamanyń saqtalýyn baqylaý maqsatynda 12 jospardan tys tekserý júrgizilgen.
«Tekserýler barysynda ekologııalyq zańnama talaptaryn buzýdyń 13 deregi anyqtaldy. Zań buzýshylyqty joıý týraly 6 uıǵarym berildi. Anyqtalǵan buzýshylyqtarǵa qatysty 34 ákimshilik is qozǵaldy. Onyń ishinde 4 ákimshilik isti toqtatý týraly qaýly shyǵaryldy. Qalǵan ister boıynsha 4 841 360 teńgeniń ákimshilik aıyppuldary salyndy. Osy kezeńde tabıǵatty lastaýshylar 4 mln 323 myń 360 teńgeniń 14 aıyppulyn óz erkimen óndirdi. Buǵan qosa ótken jyldary salynǵan 104 mln 599 myń 738 teńgeniń aıyppuly óndirilip alyndy, -dep habarlady departament basshysy Álibek Bekmuhametov.
Eske sala ketelik, budan buryn Atyraýda dalaǵa tógilgen katalızatorǵa uqsas qaldyqtar jartylaı kómilgenin jazǵan bolatynbyz.
«Atmosferalyq aýany qorǵaý respýblıkalyq ǵylymı-zertteý ortalyǵy» JShS Atyraý qalasyndaǵy fılıalynyń júrgizgen zerthanalyq taldaý qorytyndysymen dalaǵa tógilgen qaldyqtardyń quramynda nıkeldiń biraz mólsheri bar ekeni anyqtaldy. «Greıs Kazahstan Katalısts» JShS-niń «Atyraý munaı óńdeý zaýyty» JShS-ne usynǵan anyqtamasyna sáıkes, paıdalanylǵan katalızor quramyndaǵy nıkel ólshemi 5000 ppm quraǵan.
Keıin dalaǵa katalızatorǵa uqsas qaldyqtyń tógilýine qatysty tekserý júrgiziletinin habarlaǵan bolatynbyz.
«Prokýratýra tarapynan katalızatorǵa uqsas qaldyqty dalaǵa tókken kompanııany anyqtaý úshin aldyn ala taldaý júrgiziledi. Qorshaǵan ortaǵa qaýipti qaldyqqa jaýapty kompanııa anyqtalǵannan keıin ǵana tekserý bastalady», - dep málim etti Atyraý oblysynyń tabıǵat qorǵaý prokýrory Erkebulan Ermekov.