Atyraý oblysynda suıytylǵan gazdyń eń tómengi baǵasy 54 teńge bolyp bekitildi
Atyraý oblystyq energetıka jáne turǵyn úı-kommýnaldyk sharýashylyq basqarmasy usynǵan málimetke qaraǵanda, óńirde 107 avtogaz quıý beketi tirkelgen.
«Atyraý qalasynda avtokólikke suıytylǵan gaz quıatyn 50 stansa bar. Al, Jylyoı aýdanynda 19, Qurmanǵazyda – 11, Qyzylkoǵada – 6, Maqatta – 6, Inderde – 6, Isataıda – 6, Mahambet aýdanynda 3 stansa ornalasqan. Básekelestikti qorǵaý jáne damytý agenttigi tóraǵasynyń 2023 jylǵy 30 maýsymdaǵy buıryǵyna sáıkes suıytylǵan gaz baǵasyna ózgeris engizildi. Soǵan baılanysty Atyraý qalasy men odan 200 shaqyrymǵa deıingi qashyqtyqta ornalasqan eldi mekenderdegi gaz quıý stansasynda suıytylǵan gaz baǵasynyń lıtri 54 teńgeden satylady. Al, oblys ortalyǵynan 200 shaqyrymnan asatyn qashyqtyqtaǵy eldi mekenderde suıytylǵan gaz baǵasynyń bir lıtri 59 teńge bolyp bekitildi. Atyraý oblysyndaǵy suıytylǵan gaz baǵasy elimizdegi eń tómengi baǵa bolyp qala beredi», - dep habarlady basqarmadan.
Eske sala ketelik, budan buryn elimizde suıytylǵan gazdyń jańa shekti kóterme saýda baǵasy kúshine engeni habarlanǵan edi. Energetıka mınıstrligi baspasóz qyzmetiniń málimetinshe, 2022 jyly Qazaqstanda suıytylǵan munaı gazynyń óndirisi 2021 jylmen salystyrǵanda 400 myń tonnaǵa nemese 10%-ǵa tómendegen.
«Gaz jáne gazben jabdyqtaý týraly» QR Zańyna sáıkes QR Energetıka mınıstrligi jyl saıyn 1 shildeden bastap óndirýshi zaýyttar úshin suıytylǵan munaı gazynyń kóterme saýda baǵasyn belgileıdi. Belgilengen shekti kóterme saýda baǵamen tonnasyna 33 600 teńge (QQS eseptemegende) zaýytqa baılanysty suıytylǵan munaı gazyn óndirýdiń ózindik quny tonnasyna – 42 000-72 000 teńge», - dep málim etti vedomostvodan.
